Ka jingdawa kam dei tang ban pynsangeh hynrei don ruh kiba kyrshan: Prestone Tynsong

Shillong, Naitung 30 : Hapdeng ka jingïakhih paidbah bad ka jingkynnoh ba ki ki pulit ki pyndonkam da ki tear gas shisngi shuwa ban pynlong ïa ka Public Hearing jong ka Shree Cement Ltd, na ka liang u Symbud Myntri Rangbah ba khmih ïa ka tnat Kam Pohiing (Police), u Bah Prestone Tynsong, ha ka sngi Palei u la ong ba ka jingthmu jong ka Sorkar ka long ban pynneh ïa ka suk ka saiñ bad ban ailad ïa ka kam ba kan ïaid katkum ka aiñ.
Haba kren bad ki lad pathai khubor, u Symbud Myntri Rangbah u la ong ba ka Sorkar ka la dep bthah ïa ki bor pynïaid Distrik ban peitngor bha bad ban pynïaid ïa kane ka kam da ka rukom kaba dei.
“Ngi la dep bthah ïa ki bor pynïaid Distrik ban peitngor bad ban pynïaid bha ïa kane ka kam. To ngin ap bad peit kumno kan long,” u la ong.
U la ong ruh ba u la dep ai jingbthah kaba shai ïa u Deputy Commissioner bad u Superintendent of Police halor kane ka bynta.
Haba jubab balei ba la pynlong ïa ka Public Hearing watla don kiba pyrshah, u Tynsong u la ong ba ym dei baroh ki paidbah kiba pyrshah ïa kane ka project.
“Lada phi peit tang ïa kawei ka liang, phi lah ban pyrkhat ba baroh ki pyrshah. Hynrei don ruh bun ki paidbah kiba kwah ba ka project kan ïaid shakhmat. Kumta ym dei tang ka jingdawa ban pynsangeh, hynrei don ruh kiba kyrshan ïa ka,” u la ong.
U la ban jur ruh ba ka Public Hearing ka long kaba donkam namar dei lyngba kane yn lah ban sngap ïa ka jingsngew jong ki paidbah.
“Ngi ruh ngi sngewkhia halor ka jingïada ïa ka mariang. Hynrei ki kyndon jingïada mariang la buh da ka Sorkar Pdeng bad ki paidbah bad ka kompani ki hap ban bud pura ïa kine ki kyndon. Ym don ba lah ban pynkylla ïa ka aiñ,” u la ong.
U Bah Prestone u la ong ruh ba bun ki shnong ha East Jaiñtia Hills ki la ïoh jingmyntoi na ki karkhana dewbilat kiba la don lypa.
“Bun ki paidbah ki ong ba ki dang kwah shuh shuh ki kompani dewbilat namar ki ïohi ba ki wanrah kamai, lad ïohkam bad jingïarap ïa ki shnong. Wat ki Dorbar Shnong ruh ki la ïathuh ba ki ïoh jingmyntoi shibun na kine ki kompani, bad ki kompani ki la noh jingïarap ruh sha ki kam pynroi ha ki shnong,” u la ong.
Haba kylli shaphang ka jingïakhih bad ka jingkynnoh kiba mih na ka liang u Symbud Myntri Rangbah u la ong ba un sa peit ïa ka kaiphod jong ki pulit.
“Ka jingkhmih jong nga ka long ban pynthikna ba ka suk ka saiñ ka neh. Ngan sa ïoh shwa ïa ka kaiphod jong ki pulit bad hadien kata ngan sa kren shaphang kane ka kam,” u la bynrap.