Dawa ka MRTF ban pynsangeh mardor ïa ki Nongshangkai Suwari ban shet bam harud surok

Shillong, Naitung 30: Ka Meghalaya Rural Tourism Forum (MTRF) ka la thoh sha u Myntri ka tnad Tourism u Timothy D Shira ban wanrah da ka aiñ ban mana ïa ki nongjngohkai pyrthei ba kin shet bam ha ki jaka paidbah, haba pynpaw ba kane ka jingleh jong ki ka pynjaboh ïa ki jaka ba itynnad ka Jylla bad ka pynduh nong ïa ki kam khaïi pateng jong ki trai Jylla khamtam ki dukan bam lane ki Restaurant.
Ha ka shithi ba la aiti ha u Myntri ka tnat Tourism, u President ka MRTF u bah Alan West Kharkongor u la ong ba ka Jylla ka la sakhi ïa ka jingkiew stet ha ka jingwan ki nongshangkai pyrthei kiba kham bun na ki jylla ba marjan, kiba poi ryngkat bad ki tiar shet, ki marbam ban ïashet bam.
Ha ka jaka ban pyndonkam ïa ki jaka bam bad ki jaka sah lane ki Restaurant kiba don ha kane ka Jylla, kine ki nongwan shangkai pyrthei ki pynkylla pynban ïa ki rud surok, ki rud wah, ki jaka peitkai bad kiwei kiwei ki jaka paidbah kum ki jaka shet jingbam lane ki (Picnic Spot) ba shipor.
Ka Forum ka la ong ba kane ka jingleh ki nongwan shangkai pyrthei ka la wanrah pynban ïa ka jingjyllei jong ki jaboh, kum ki pliang plastic, ki bilor bad ki tiar ba lah ban pyndonkam tang shisien kaba pynsniew ïa ki jaka ba ka Meghalaya ka pawnam bha namar ka jingkyrkhu ka mei mariang.
ïa kane ka jingleh ki nongwan shangkai pyrthei, la sei madan ka jingïalang hapdeng ka Federation of Shillong Hotels, Tour Operators Association of Meghalaya, Tour Guides Association of Meghalaya, ki Transport Operators, Clean Sohra Campaign bad ka Hima Sohra Tourist Assistance Team.
Ka Forum ka la mynjur ba donkam ïa ka jingtuklar jong ka Sorkar ban ïada ïa ka mariang bad ïa ka kamai kajih jong ki paidbah kiba im naka kam jngohkai pyrthei.
U bah Alan West u la kyntu ïa ka tnat Tourism ba kan pynmih ïa ka jingpynbna ha ka jylla baroh kawei kaba mana ban shet jingshet ha ki jaka paidbah bad ha rud surok, bad ban pynthikna ba kan poi sha ki nongwan jngohkai shwa ba kin rung sha ka Jylla Meghalaya.
U la ai jingmut ban pynbna paidbah lyngba ki lad pathai khubor, ka jingpyni paidbah haki hotel, Resort, ki Kali, bad ka jingpynphriang ha kylleng ki website jong ka Directorate of Tourism bad ha ki rynsan Social Media.
Ka Forum ka la pan ruh ka jingïatreilang hapdeng ki nongpynphriang (Influencer) ban ïalap halor kane ka rai.
Kala ai jingmut ban buh ïa ki jingthoh ha ki shnong shwa ban rung shapoh ka Jylla kum ha Byrnihat bad Nongpoh, bad ha kiwei kiwei ki jaka jngohkai ba khring bun ki briew.
Ka la tyrwa ban ïatreilang bad ki nongshong shnong, ki seng treimon sngewbha bad ki kynhun ba khmih ïa ka kam jngohkai pyrthei ban pynphriang ïa ka jingtip bad ban kyntiew ïa ka jingbud ryntih ïa ka jing mana.
Ka Forum ka la pynpaw ruh ïa ka jingdonkam ban don ïa ki lad ban weng ïa ki jaboh ha kylleng ki jaka jngohkai pyrthei kiba mih na ka jingwan ki nongwan jngohkai pyrthei.
Nalor kane ka MRTF ka la pan jingtip na u Myntri halor ki jinglap jong ka Committee ba la thaw bun snem mynshwa ban peit bniah ïa ki jingeh ba la pynpaw da ki nongpynïaid kali trai Jylla.
Haba batai ïa ki lad ki lynti kum kiba donkam na ka bynta ka kam jngohkai pyrthei, u Bah Alan West u la ong ba kin ïarap ban ïada ïa ka mariang jong ka Meghalaya bad ban pynneh ïa ka nam jong ka Jylla kum ka Jylla kaba khuid tam.