Ka sorkar ka la kut jingmut ban pynïoh ïa ka jingpule kaba katkum kane ka juk kaba mynta: Lahkmen

Shillong, Naitung 26: Ka jingpynkup burom pynpaw jingkmen ïa ki samla pule kiba la pyndep ïa ka jingshah hikai lyngba ka SPARK ka la long ha Nongtalang Government Higher Secondary School, Nongtalang, bad kane ka kren ruh ïa ka jingkiew ka pule ha ka jylla bad ka jingdonkam jong ka subjek Science, Technology, Engineering bad Mathematics ha ki jingpule.
U Myntri ba dei peit ïa ka Tnat Pule Puthi ka jylla u Bah Lahkmen Rymbui ha ka jingkren ka jong u la ai ka jingïaroh ïa ki khynnah kiba la ïa shim bynta ha ka jinghikai namar kane ka long kaba donkam ha ki snem bad ki por ban dang wan, namar ka SPARK ka long ban wanrah ïa ka jingkylla ha ki jaka pule ha kaba ki ïoh ban leh hi dalade.
U Myntri u la ong ba ka sorkar ka la kut jingmut ban pynïoh ïa ka jingpule kaba katkum kane ka juk kaba mynta, ban pynshlur ïa ki jinghikai online, u kyntu ïa ki samla pule ba kin pynleit jingmut ha ka pule puthi ka jong ki khnang ba kin lah ban noh ïa u syniang ha ka imlang sahlang.
Ha kane ka sngi ki samla kila pyni ïa ki sap jong ki ha kaba ki la shna bad batai ïa ki jingshna kiba ktah ïa ka jingim briew kiba man ka sngi, kine ki jingshna ki long kaba ki samla pule ki pyni ïa ka jingshemphang ka jong ki kaba ki la ïoh na kane ka jinghikai SPARK kaba ai mynsiem ïa ki ïa ka jingsngewthuh ïa ka saïan bad ka jingthmu jong ka.
Ha kane ka sngi la don lang ruh District School Education Officer (DSEO), West Jaiñtia Hills, Assistant Commissioner, u CEO ka Avenues, ki nongpynïaid jong ki skul bad ki nongïalam bad ki riew rangbah na ka thaiñ Nongtlang.