Ban pynbor ïa ka sorkar jylla ban pyntreikam noh mardor ïa ka MRSSA 2016
Yn ïa syllok ka KSU bad ki Dorbar Shnong
Shillong, Naitung 26: Ka Khasi Students’ Union (KSU) ha ka sngi Saitjain ka la pynbna ïa ka jingthmu ban pynlong ïa ka jingialang paidbah bad ka jingïasyllok bad ki dorbar shnong ha kylleng ka jylla Meghalaya ban pynbor ïa ka sorkar jylla ban pyntreikam noh mardor ïa ka Meghalaya Residents Safety and Security Act (MRSSA), 2016.
Haba ïa kren bad ki nongthoh khubor, u general secretary ka KSU u samla Reuben Najiar u la ong ba ka seng kan pynjur ïa ka jingïakhih jong ka, da kaba kynnoh ba ka sorkar ka la pynslem ban pyntreikam ïa kane ka aiñ katba ka ai daw “ki bym lah ban ieng ha ka jingpeit bniah.”
Da kaba kdew ïa ka jubab RTI, u samla Najiar u la kynnoh ba ka Ministry of Home Affairs kam don jingtip ei ei shaphang kane ka kam bad ba ka High Court kam shym la pynbeit ïa ka mukotduma kaba ïadei bad kane – kaba pyrshah ïa ka jingong jong ka sorkar kaba kham mynshwa ba kane ka kam ka dang sahkut ha ka MHA bad ka ïingbishar.
“Kam don kano kano ka daw ba ym lah ban pyntreikam ïa ka Act 2016″, u la ong, katba ka amendment Act 2019 ka dang sah bad ka sorkar kmie kaba ap ïa ka jingmynjur jong u President.
U samla Najiar u la ong ba ka amendment ne ka jingpynkylla jong u snem 2019 ka dei khamtam eh ïa ka jingpynshitom bad ka jingpynbeit, bad ba dei tang ka Inner Line Permit (ILP) kaba lah ban pynbeit bha ïa ka jingrung shapoh ka jylla.”La don mano mano kiba kam ba ka 2019 amendment ka lah ban tehlakam ïa ka jingwan rung ki briew ba nabar, kila ïalam bakla ïa u paidbah” u la ong.
Halor ka Facilitation Centre ha Umling, u la ong ba ka KSU kam shym la ioh kano kano ka jingpynbna kaba thymmai bad ba la ai jingmut ban leit jurip ïa ka jaka ha ka jingïakynduh bad ka KSU North Khasi Hills District Unit.
Haba pynpaw ïa ka jingsngewkhia halor ka jingkiew ka jingwan buhai shnong, u samla Najiar u la pynïadei ïa kane bad ki jingpynher krad ïa ki briew na Assam bad West Bengal.”Ngim kwah ba ka jylla Meghalaya kan mad jingeh namar ka jingwan tuid ki briew na ki jylla ba marjan”, u la ong.