Katba ka jingbun ki samla kiba pyndep ïa ki jingpule ba kham shalor ka nang kiew man la u snem, hynrei ka jingduna ki lad jingïohkam, khamtam ha ki tnat sorkar, ka la pynlong ïa ka jingbymdonkam ban long kawei na ki jingeh kiba khraw tam ha Meghalaya. Ki riewshemphang ha ka ïoh ka kot ki ong ba ka jylla ka dei ban phai khmat noh sha ka kam lajong (self-employment) bad ka entrepreneurship kum ka lynti kaba paka ban thaw ïa ki lad jingïohkam thymmai.
Katkum ka jingïohi jngai jong ki, ka jylla kam lah ban shaniah tang ha ka jingthaw kam sorkar namar ka jingdon ki kam ka dang duna bha haba ïa nujor bad ka jingbun ki samla kiba rung sha ka thup ki nongwad kam man la u snem. Kane ka la pynlong ïa bun ki samla ban ap da ki snem ïa ki eksamin kam sorkar katba kiwei pat ki mih na la shnong ban wad ïa ki lad ïohkam sha ki jylla bapher.
Ki riewshemphang ki ong ba Meghalaya ka don bun ki lad ban ioh jingïarap kiba khlem pat pyndonkam pura. Ha ka liang ka rep ka riang, ka jylla ka pynmih bun jait ki mar kum u shynrai Lakadong, u kwai, u sohiong, u sohphie, u sying, sohñiamtra, sohphan bad kiwei ki mar rep kiba lah ban kyntiew ïa ka ïoh ka kot lada la pynwandur bad pynheh ïa ka ïew.
Ha ka bynta ka jngohkai pyrthei ruh, ka jylla ka dang don bun ki lad ban thaw kam lyngba ki homestay, tourist guide, adventure tourism, restaurant, transport, handicraft bad kiwei ki kam kiba ïadei bad ka hospitality industry.
Nalor kata, ka jingïar paidbah jong ka digital technology ka la plie ruh ïa ki lad kam thymmai ha ki bynta kum ka graphic design, software development, video editing, digital marketing, online business bad content creation, hynrei kiba bun ki samla ki dang duna ka jingïoh jinghikai bad ka jingïoh pisa ban sdang ïa kine ki kam.
Ki sienjam ban pynduna ïa ka jingbymdonkam ka donkam ïaka jingbtin lynti jong ka sorkar ha ki bynta bapher bapher ba ki dei ban shim ïa ki sienjam kiba paka ban pynkhlaiñ ïa ka kam lajong. Kawei, ka sorkar ka dei ban pynbun ïa ki Skill Development Centre ha baroh ki district ban ai jinghikai ha ki kam ba don jingïadei bad ka technology, tourism, agriculture, food processing bad entrepreneurship.
Ka ar, ka jingïoh jingïarap pisa na ki bank bad financial institution ka dei ban long kaba suk khnang ba ki samla kiba kwah ban seng business kin ïoh loan da ka sut kaba duna bad ki kyndon kiba suk. Ka lai, ka jylla ka dei ban thaw shuh shuh ïa ki Business Incubation Centre ha ki kolej bad skulbah ban jingïarap ïa ki startup thymmai, kynthup ïa ka jingïalam lynti, jingïoh jinghikai bad jingïarap ban pynïasoh bad ki ïew.
Ka saw, ka sorkar ka dei ban pynkhlaiñ ïa ka food processing industry bad ka value addition ïa ki mar rep da kaba tei ïa ki cold storage, packaging centre bad processing unit khnang ba ki nongrep kin ïoh nong kham bun bad ki samla kin ïoh lad jingïohkam. Ka san, ka jylla ka dei ban kyntiew ïa ka digital infrastructure, khamtam ka internet kaba sted ha ki thaiñ nongkyndong, ban ailad ïa ki samla ban trei online bad seng digital business. Ka hynriew, ka sorkar bad ki private company ki dei ban pynbun ïa ki internship, apprenticeship bad jingïoh jinghikai ba ki samla kin ïoh ïa ka jingïarap shuwa ban sdang ïa la ka jong ka kam.
Ka hynñiew, ka jylla ka dei ban pynkhlaiñ ïa ka tourism policy bad pynroi ïa ki shnong ba don ki kam jngohkai pyrthei da kaba ai jingïarap ïa ki homestay, adventure tourism bad ki shnong kiba pynneh ïa ka kolshor bad ka mariang. Ki riewshemphang ki kdew ba ka jingïatreilang hapdeng ka sorkar, ki bank, ki educational institution, ki shnong bad ki private sector ka long kaba donkam ban thaw ïa ka sawdong sawkun kaba kyrshan ïa ka entrepreneurship.
Ka jingkylla kaba kongsan tam ka dei ha ka jingmut jingpyrkhat jong ki samla. Ha ka jaka ban ap tang ïa ka kam sorkar, ki samla ki dei ban peit ïa ka kam lajong kum ka lad ban thaw ïa la ka jong ka jingïohkam bad ban ai ruh ïa ka jingïohkam ïa kiwei.
Katkum ka jingïohi jong ki, lada ka jylla ka lah ban pyndonkam hok ïa ki sap jong ki samla bad ka jingïarap jong ka sorkar, ka kam lajong kan kylla long kawei na ki lynti kiba paka tam ban pynduna ïa ka jingbymdonkam bad ban pynkhlaiñ ïa ka ïoh ka kot ha Meghalaya.
