Pynrem jur ka SWKHD Congress ba shah bom shah shoh ki samla pule bad shah rah jubor u Rahul Gandhi

Mawkyrwat, ‘Naitung 22 : Ka South West Khasi Hills District Congress Committee, hapoh ka jingïalam u Bah Kynpham V. Kharlyngdoh, President, ka la pynlong ïa ka jingïakynduhlang ha ophis treikam jong ka party ha Mawkyrwat ban pynpaw ïa ka jingsngewsih bad jingsngewkhia kaba jur halor ka jingïakhih jong ki samla pule ha Jantar Mantar, New Delhi.
Haba kren sha ki lad pathai khubor, u Bah Kynpham V. Kharlyngdoh, President ka South West Khasi Hills District Congress Committee u la ong ba ka Congress ka pynrem jur ïa ka jinglehdonbor jong ki bor synshar ka Sorkar India hapoh ka jingïalam jong ka BJP ha kaba bun ngut ki samla pule kiba mih paidbah ban dawa ïa ka hok halor ka jinglait tuh jong ki jingïingkylli eksamin kum ka NEET, JEE, NET bad kiwei pat ki eksamin, ki la shah bom bad shah shoh watla ka jingïakhih jong ki ka long kaba jai jai.
U la ong ruh ba ka party ka pynrem jur ïa ka jingshah rah jubor u Rahul Gandhi lem bad katto katne ngut ki MP jong ka Congress, kiba dei ki nongïalam liang pyrshah ha Parliament, katba ki dang leit ban ai mynsiem bad pynpaw ïa ka jingïatylli bad ki samla pule kiba jingïakhih.
Ka South West Khasi Hills District Congress Committee ka ai ïa ka jingkyrshan kaba pura ïa ki samla pule kiba dawa ïa ka hok bad ka jingtohkit kaba khuid halor ka jinglait tuh jong ki jingkylli eksamin. Ha kajuh ka por, ka party ka dawa ïa u Myntri Rangbahduh ka Ri, u Narendra Modi, ba un shimkhia mardor halor kane ka kam bad ban pynthikna ba yn leh ïa ka jingtohkit kaba laitluid bad kaba hok.
Shuh shuh, ka party ka dawa ruh ba dei ban pynhiar shuki noh ïa u Dharmendra Pradhan, Myntri ba peit ïa ka Tnad Pule Puthi jong ka Ri India namar ka jingbym lah jong ka tnad ban ïada ïa ka jingïaid beit jong ki eksamin bad ban ai ka jingshakri ba don ïa ka jingshaniah jong ki samla pule bad ki paidbah.
Kiba la ia donlang ha kane ka sngi ki long u Arful Syiemlieh, General Secretary ka South West Khasi Hills District Congress Committee, u bah Manstudy Nongrem, MDC bad EM barim ka KHADC, u bah Denis Nongsiej, Vice President ka South West Khasi Hills District Congress Committee, u bah Andreas Kharkongngor, General Secretary ka Mawkyrwat Block Congress Committee, ka kong P. Kharwanniang, President Mahila jong ka Mawkyrwat Block Congress Committee, bad ka kong Banisha Wahlang, General Secretary jong ka Mahila Mawkyrwat Block Congress Committee.