Ïoh bat ka KSU-Tongseng bad Narpuh Circle haduh 7 ngut ki nong Bangladesh kiba la wan rung beaiñ sha ri India

Khliehriat, Naitung 23 : Ki dkhot jong ka Khasi Students Union Narpuh Circle bad KSU Tongseng Unit hynin ka sngi ki la ïoh bat hynñiew ngut ki nong Bangladesh kiba kynthup ar ngut ki shynrang bad san ngut ki kynthei, ki la ioh bat ïa katei ka sumo ha shnong Tongseng Narpuh, ha kaba uba ñiah ïa ka kali bad u wei u dalal kiba dei na ka jylla Assam ki la ïoh ban phet krad na kti jong ki dkhot ka KSU, kumta ki dkhot jong ka seng ki la leit ban aiti noh tang ïa kitei ki hynñiew ngut ki nong Bangladesh ha ki pulit jong ka Lumshnong Police Station.
Kitei ki hynñiew ngut ki nong Bangladesh ki dei kiba la tip kyrteng kum u MD Jubar Ahmed, 26 snem kyrta, u MD Nur Ahmed, 24 snem kyrta, katba ki san ngut kiwei pat ki kynthei ki dei kiba dang rit kyrta.
Haba kren sha ki pathai khubor, u General Secretary jong ka KSU East Jaiñtia Hills District Unit, uba dei ruh na ka elaka Narpuh, u bah K.S.Suchiang, u la pynpaw ka jingsngew khia halor ka jingiohlad ki briew kiba na bar ri ban wan rung kyrthep sha kane ka jylla Meghalaya ne sha ri India “Na ka liang ka seng ngi dawa jur na ka sorkar jylla bad ka sorkar pdeng ban pyntreikam noh mardor ïa ka Inner Line Permit hapoh ka jylla, sa shien mynta ki dkhot ka KSU-Tongseng Unit ha ka jingïatreilang bad ka KSU Narpuh bad lyngba ka jingai jingtip na u Vice President jong ka KSU Narpuh Circle, u bah Phanuel Tongper, ha ryngkat ka jingïatreilang ki dkhot ngi la ioh bat ïa ka sumo kaba la kit haduh 7 ngut ki nong Bangladesh, kane ka la pynlong ïa ngi kum ka seng ban thwet jur bad khang kdong bad da ka jingïatreilang bad ki paidbah ngi la ioh bat ïa kane ka sumo kaba kit ïa ki nong Bangladesh” ong u bah K.S.Suchiang.
Utei u nongïalam jong ka KSU East Jaiñtia Hills District, u la ïathuh ruh ba katei ka sumo ka la kit ïa kitei ki nong Bangladesh na shnong Ratacherra, ha kaba ïa kane la ïohi da ki wei pat kiba ju ñiah kali kamai sumo lang, kiba la ïathuh ba katei ka sumo ka la pynieng ha kawei ka jaka ha rud ka surok ha Ratacherra bad leh mynleh kumba ka la sniew ka kali bad ha kata ka por ym pat don kiba nongshong ha katei ka kali (pasenger) tang uwei ruh, hynrei don tang u nongñiah, hynrei tang hadien katto katne por kiwei pat ki para nongñiah sumo ki la ïohi ba katei ka sumo ka la dap briew (pasenger), te hangta kita ki para ba ñiah sumo ki la suba jur ba kita ki nongshong kali (paenger) ki lah ban dei ki nong Bangladesh kiba wan ban rungtuh sha kane ka jylla, te tang shu ïoh jingtip ïa kane ngi la pyntip mar mar sha ki para dkhot kiba don ha Narpuh bad da ka jingtrei shitom ki dkhot ka KSU Narpuh Circle bad ka KSU Tongseng Unit ngi la ïoh bat ïa kitei ki nong Bangla kiba wan rung beaiñ sha ka jylla bad sha ri India” ïathuh u bah K.S.Suchiang
“Kaei kaba ngi kwah ban ong ne pynpaw hangne ka long ba ka seng ka dap da ka jingsngew khia halor kane ka jingiohlad kine ki bar ri na Bangladesh kiba wan rung tuh sha kane ka jylla, namar ioh lehse kane kan wan rah ïa ka jingma kaba khraw khamtma ïa ka jaitbynriew rit paidad, kumta ka seng na ka por sha ka por ka ïai dawa na ka sorkar ban pyntreikam noh ïa ki aiñ kiba khlaiñ khamtam ban pyntreikam noh kloi kloi ïa ka Inner Line Permit hapoh ka jylla ban tehlakam ïa ka kene ka jingwan rung kyrthep ki mynder” u la bynrap shuh shuh.
Kawei ruh kaba pynsngew bitar ïa ki dkhot jong ka seng ka dei namar kitei ki hynñiew ngut ki nong Bangladesh ki la sei haduh lai phew tylli ki I.D card, kiba pyni ba ki dei ki nong India bad kitei ki card ruh ki dei kiba la shu shon tuh (duplicate I.D.cards), katba ha ka jingshisha pat ki la phla ba ki dei ki nong Bangladesh kiba mut ban leit sha Ladrymbai.