46 tylli ki jaka thang briew ha ki 4 District ka jylla ladep mang tyngka jubab ka sorkar hakhmat ka HC

Shillong, Naitung 16 : Ka ïing Bishar High Court ha ka sngi Balang ka la shim jingthoh halor ka kaiphod ba ïadei bad ki kam ba la leh da ka Sorkar halor ki jaka thang briew, haba pynpaw ba haduh 46 tylli ki jaka napdeng ki 60 tylli ba la tyrwa, la dep ban ithuh bad dep mang pisa ïa ki.
Haba bishar ïa ka mukotduma PIL bala mudui da ka Seng Khasi Hima Crematorium, la pyntip sha ka ïing Bishar ka Chief Justice Revati Mohite Dere bad Justice W Diengdoh ba ki bor district kila dep pynlait mar 1 lak tyngka sha kitei ki jaka bala ithuh.
Kat kum ka kaiphod, ki jaka ba la dep ithuh ki kynthup ïa 34 tylli ha East Khasi Hills, 3 tylli ha Eastern West Khasi Hills, baroh 6 tylli ha Ri-Bhoi bad 3 tylli ha South West Khasi Hills.
Ka jingpynthikna ïa kiwei pat ki jaka ki dang ïaid shakhmat bad sa 6 tylli ki jaka kin dang bishar ban ithuh na ka bynta ban shna jaka thang briew.
Halor ki lum jingtep, u Additonal Advocate General ula pan por ban ïoh ïa ki jingbthah, ïa kaba ka ïing Bishar ka la mynjur.
ïa kane ka PIL la buh ban shong bishar biang ha ka 14 tarik Nailur 2026.