Kwah u Myntri Rangbah ban myntoi pura ki paidbah na ka skim bording jong ka Sorkar Pdeng

Shillong, Naitung 16: U Myntri Rangbah ka jylla, Conrad K. Sangma, u la ong ba ka sorkar jylla ka la buh ïa ki lad treikam ban pynbun ïa ki nongïoh jingmyntoi hapoh ki skhim PM Kusum bad PM Surya Ghar Mission, bad ha kajuh ka por u la ong ba ka jinglong jong ka Meghalaya Energy Corporation Limited (MeECL) ka la kham skhem shibun.
Haba kren sha ki lad pathai khubor hadien ka jingïalang bishar kam jong ka Power Department ha ka sngi Palei, u Conrad u la ong ba la bishar bniah ïa ka jingïaid jong kine ki ar tylli ki skhim ba la kyrshan da ka Sorkar Pdeng.
U la ong ba ka jylla ka hap ban ïatreilang bad ki agency bapher bapher bad ki supplier ba la ithuh da ka Sorkar India ban pynthikna ba ki jingïarap kin poi sha ki nongïoh jingmyntoi.
Katkum ka jingïathuh jong u Myntri Rangbah, ka PM Kusum ka long ka skhim ban ai ia ki nongrep da ki kor tan um ba pyndonkam da ka bording sngi ne ka (solar-powered irrigation pump). “Kaba long kaba kongsan ban pynbiang um na ka bynta ka rep ka riang. Kumta ka sorkar jylla ka la buh thong ban pynbun ïa ki nongïoh jingmyntoi jong kane ka skhim ha une u snem mang tyngka,” u la ong.
Halor ka PM Surya Ghar Mission, u Myntri Rangbah u la ong ba ka skhim ka thmu ban ai ïa ki solar panel ha ki ïing shong, ha kaba ki nongïoh jingmyntoi kin ïoh pyndonkam ei ïa ka bording ba tan na ka sngi. U la batai ba ki nongïoh jingmyntoi ki hap ban synniang ïa ka bynta jong ka jinglut, katba ïa ka bynta kaba sah yn bei tyngka da ka Sorkar India lyngba ka subsidy.
U la ong ba ka jylla ka la wad ruh ïa ki lad kumno ban pynsted ïa ka jingïatreikam bad ban pynthikna ba bun paidbah kin ïoh jingmyntoi na kine ki skhim.
Haba ïakren halor ka Meghalaya Energy Corporation Limited (MeECL), u Conrad u la pynpaw ïa ka jingsngewhun ba ka jinglong jingman jong ka pla tyngka jong ka corporation ka la kham bha haduh katta katta.
“Mynta ka MeECL ka la lah ban siew man ka por ïa ki ram, ka sut, ka tulop jong ki nongtrei, ka bai pension bad ruh ïa ka pisa ba dei ban siew sha ki agency ba shim bording,” bad bynrap ba ka jinglum pisa ka la kiew bha shibun na kaba ju long baroh shi katta.
“Kumta suki suki ngi khmih lynti ba ngin sa lah ban pyndep ïa ki ram ba rim bad ngi khmih lynti ba hapoh san haduh hynriew snem, ka MeECL kan don ïa ka jingkhlain ka pla tyngka kaba skhem bha, kaba long ka jingmyntoi ym tang ïa ka tnat bording hynrei ïa ka jylla hi baroh kawei,” ong u Myntri Rangbah.
U Conrad u la ïathuh ruh ba ka sorkar ka dang wad ïa ki lad ban pynbun ïa ka jingpynmih bording ha ka jylla, kynthup lyngba ka Leshka Stage-II Project bad kiwei pat ki projek.
Ha kajuh ka por u la ong ba u la ai jingmynjur ban pynïaid shakhmat ïa ki jingïakren halor kine ki projek bad ban wad ïa ki lad kumno ban pynkiew ïa ka jingpynmih bording, khamtam na ki projek kiba la don lypa.
U la ong ba baroh kine ki mat la ïakren bniah ha ka jingïalang bad ka Power Department kan dang pynkhreh ïa ki lad jingïaid ban pyntyllun ïa ki, katba ka sorkar kan dang bteng ban peit bniah man ka por ïa ka jingïaid shaphrang jong kine ki kam.