Hap don ki sabut ban pynshisha halor ki jingkynnoh pynjaboh ka kompani pynmih Ethanol ha Byrnihat: Wailadmiki

Shillong, Naitung 15 : U Myntri ka Koit ka Khiah Bah Wailadmiki Shylla ha ka sngi Ba-ar ula ong ba ka Sorkar kan nym lah ban shu leh ei ei ne pynsaja ïano ïano tang na ki khubor Social Media halor ka jingkynnoh pynjaboh ka karkhana pynmih ethanol ha Byrnihat tad haduh ba kan da ïoh pdiang ia ki jingujor bad ki jingkheiñ jingdiah ban kyrshan ryngkat ki sakhi sabut kiba biang.
U Bah Wailad ula ong ba kane ka jingkynnoh kam pat poi satia da ka jingthoh sha ka Sorkar Jylla bad ban jur ïa ka jingdon kam ryngkat ki jingpynshisha.
“Ym pat wan satia kano kano ka jingthoh. Ka long kaba kongsan ban ai da ka jingthoh nalor ki jingkheiñ jingdiah ki ban kyrshan ïa ka jingkynnoh” ula ong.
U bynrap ba katba ka Sorkar ka dang bishar ïa ka kam, kam lah pat ban leh eiei mardor tang da kaba pynshong nongrim na ki jingthoh ha ki social media namar ka ktah ïa ka kamai kajih.
“Ha u snem 2014, ka NGT kala wan rung. Ki jingktah ïa ka mariang ki la don ha katei ka por, ngim lah ban len ïa kata. Hynrei ngi hap ruh ban pyrkhat halor ka jingktah ïa ki briew kiba sah ha katei ka thain” ong u Bah Wailad.
U Myntri u pyntip ba ka Sorkar ka la dep shim ïa ki sienjam ha Byrnihat, kynthup ka jingkhang dam ïa ki karkhana kiba pynkheiñ ïa ki kyndon.
Ula kdew ïa ka jingai khusnam ba dang shen sha ka Meghalaya State Pollution Control Board namar ki kam ba ka la leh ha ka thaiñ, kiba long ki sakhi ïa ka jingïaid ka kam ban pyrrkhing ïa ka jingpynjaboh ïa ka mariang.
U Bah Wailad ula pynshai ba ka Sorkar kam kyntait ïa ki jingjaboh ka lyer ha ki jaka ba don ki karkhana hynrei ka long pat kaba donkam ban hap pynshisha ïa kiba pynkheiñ kyndon.