Pulom ka jingjurip ïa ki jaka ha Bataw ba khlem wanpoi ki nong ujor kiba kam trai ïa ka jaka

Khliehriat Naitung 14: Ki paidbah nongshong shnong jong ka shnong Bataw, East Jaiñtia Hills District, hapoh ka jingialam u Waheh Shnong u Bah Deihok Sumer, mynta ka sngi ki la ïa mih paidbah ban ïa leit lang ban jurip ïa ka jaka kaba don ka jingujor, hynrei kane ka jingthmu ban jurip ka la pulom noh na ka daw ka jingbym wan poi ki briew kiba ujor, ki paidbah nongshnong shnong ki la kynnoh ruh ba kita kiba ujor ki la kam trai ïa ki jaka kiba dang dei ki jaka jong ka shnong Bataw, ha kane ka sngi la wan poi tang u Magistrate, u Dr T. Shylla bad ki pulit lem bad ki nongshong shong na Bataw.
Haba kren sha ki pathai khubor u Waheh Shnong Bataw, u bah Deihok Sumer u la ong, “Ngi la ïa wan da kawei ka jingmut ban ia leit sha ka jaka ban pynlong ïa ka jingjurip kaba long katkum ka hukum ne ka order jong u Deputy Commissioner bad kum ka shnong ngi don lang ha kane jaka ban ïa leit jurip bad ngi wan ruh da ka lynti kaba jai jai ban ïa don lang”
U la ïathuh ruh ba “Ki don kiba la ujor ïa ki jaka shnong, hooid ngim pyrshah ïa ka hukum u DC hynrei ngi pyrshah ïa ka jingkam trai ïa ki jaka shnong namar kane ka jaka jong ka shnong Bataw kaba kum ka shnong ka la don ki kot ki sla naduh u snem 2009, ngi don ruh ka map, kum ka shnong ngi la dep buh kawei ka kot jingthoh namar ioh don kiba wan shim kabu, ngi la ai jingthoh ruh sha u RO jong ka JHADC myn ha ka 2 tarik u risaw 2025 na ka bynta ban kyrpad ba lada don mano mano ba aplai kot ïa kane ka jaka jong ka shnong ki dei ban da ioh ïa ki kot jingpynshisha, hynrei kane ka shithi ka jong ngi na ka liang u RO u khlem sngap ha kaba ngi ïohi ba don ki kot jaka ba la pyllait da ka JHADC ha kaba iadei bad kane ka jaka bad kane ka jing ai kot ka JHADC ka dei kaba khlem ka jingtip jong ka shnong”.
Shuh shuh, u waheh shnong u la ong “Kane ka jaka ka dei hapoh ka tnat Forest, ngi burom ïa ka JHADC bad ka council ka dei ban burom lang ïa kiwei kiwei ki tnat ruh namar ba kane ka jaka ka hap ha tnat Forest te kumno lah ban phah pat sha ka tnat Revenue department, ngi kwah ban phah ka khubor kaba shai sha ki nongshim kabu ioh lehse don katto katne kiba lah ban ïa don bynta bad kiba ujor, kiba shim kabu namar ka jingbym don doloi jongngi hapoh ka elaka Rymbai, kumjuh ruh ngi phah kawei ka khubor da ka sur kaba shai kdar sha ka sorkar ba ngi ngim pyrshah ei ei ruh ïa kane ka project ban shna ïa ka surok High Speed Corridor, hynrei ngi pyrshah ïa kiba wan kam trai ïa ki jaka shnong bad halor kane ngi la dep ai jingthoh ruh sha u CEM ka JHADC halor ka jingpyllait kot sha kiwei ki briew ïa kine ki jaka shnong ha kaba ka JHADC hi ka dep pynshkem ïa kane ka jaka naduh u snem 2008 kaba long katkum ki kot ki sla ba ngi don, nga kyntu ïa u CEM ba un shim khia ïa kane ban pynioh ïa ka hok jong ka shnong”
Na ka liang u Chairman Shnong Bataw, u bah Bhalang Suchiang, u kyntu ïa u MDC ka thaiñ, u Dr Sanky Shangpung ba un sngewbha ban shimkhia ïa kane ka kam ba ïadei bad kane ka jaka khnang ban long ka shnong kaba shongsuk shongsaiñ, u la ong ruh ba kine ki briew kiba ujor ki don da ki kot jaka ki bym shisha ne ki kot thok bad ki jaka ba ki kam trai ki dei ki jaka kiba dang hap hapoh shnong Bataw bad ki dei ki jaka rep jong ki nongshong shnong bad ka JHADC kam dei ban shim kabu. U la kynnoh ruh ba kiba ujor ki dei u bah Moonlight Pariat, u bah Niwel Lyngdoh bad kiwei.
U Assistant Waheh Shnong, u bah Martin Lyngdoh, u la kubur ïa ki jingkren u Waheh Shnong bad jong u Chairman Shnong bad u la kyntu ïa u MDC, Dr S,Shangpung ba un sngewbha pynduh pyndam noh ïa ki kot jaka jong ki briew kiba ujor ïa ki jaka jong ka shnong Bataw.