Sha kylleng ki jylla ka ri India phah jingtip ki pulit ban ïohkem ïa u nongleh be-i-jot ha Laitumkhrah

Shillong Naitung 14: Ki pulit ka East Khasi Hills ki la pynmih ka jingpynbna bad phah jingtip sha baroh ki jylla ka ri India da ka All-India Lookout Notice bad thaw ruh da ka kynhun ban wad ïa u runar ba kynnoh leh be-i-jot ha ka case ba la ujor ha Laitumkhrah PS.
U Superintendent of Polic (SP) Bah Vivek Syiem u la ong ba ki Pulit ka Jylla ki la sdang ïa ka jingïatreilang bad ki Pulit ka Jylla Mizoram nalor bad kiwei pat ki jylla.
“Ha kaba ïadei bad ka kam leh be-i-jot kaba la rejister ha Laitumkhrah PS, ha ka jingshisha ngi la phah ïa ka Lookout Notice sha Mizoram bad mynta ngi la pynmih ruh sa ka All-India Lookout Notice. La thaw ruh da ka kynhun ban wad ïa uba shah kynnoh ha kane ka kam” la ong u Bah Vivek.
U Bah Vivek ula ong ba ki Pulit ki la dep ban shim jingthoh ïa ka jingbatai jong ka lanot bad la suba ruh ba don sa kiwei pat ki lanot.
“Ngi la shim jingthoh ïa ka jingbatai jong ka lanot. Ngi la tip ruh ba ki don kiwei pat ki nongshah thombor. Ngin hap tohkit ruh ïa ki ha ka por ban wan” ula ong.
U Bah Vivek u la bynrap ruh ba la ïoh ban ïakren ïa kiwei ki lanot lyngba ka Phone bad la bthah ïa ki ban wan ujor daka ejahar.
“Ngi la ïakren bad katto katne ngut ki nongshah thombor hynrei ka dei tang lyngba ka phone. Mynta ngi la phone ïa ki ban wan khnang ban ïoh shim jingthoh ïa ki jingbatai jong ki halor ki jingjia bad ha kajuh ka por ngi la kyntu ïa ki ban ujor daka ejahar” u la ong.
Ki pulit ki dang pynshisha ruh ïa ki jingkynnoh kiba la saphriang ha ki rynsan social media.
“Ki jingthoh ha ki rynsan social media kim dei ki jingshisha. Ngim pat lah ban pynthikna ïa ka jingshisha jong kata. Tang hadien ba ngi la bishar bniah ïa ki briew bad shim jingthoh ïa ka jingbatai ngin sa lah ban pynthikna lada ki dei ki nongshah thombor ne em” la ong u SP.
U SP ula ïathuh ruh ba la talasi ïa ka ïing jong u nongshah kynnoh ha Aizawl hynrei ym shym la lapdien ïa u.
“U khlem leit sha Aizawl. Nga la ïakren bad u SP ka Aizawl. Ki la talasi ia ka jaka sah jong u hynrei um shym la lap satia ïa u” ula ong. U Bah Vivek ula ong ba yn sa lah ban pynngat kyndon ynda la ïoh ban kem ïa u nongshah kynnoh.