Na ka 12 tyngka shi kilo na jaka rep sha ka 1500 tyngka shi kilo ha ki ïew shabar ri yn shongdor u Sohtrun

Shillong, Naitung 12 : Ka Meghalaya ka la pyninam ïa ka ïoh ka kot lyngba u sohtrun hakhmat jong ki nongthied ka ri bad ki nongkhaïi ban pyni kumno ba une u soh uba die ha ka dor 12 tyngka shi kilo na ki jaka rep u lah ban pynkylla sha ki mar ki ban shongdor haduh 1,500 tyngka shi kilo ha ki ïew shabar ka ri.
Kane ka kyrwoh kala mih ha ka jingplie ïa ka Fourth Meghalaya Pineapple Festival ha Dilli Haat ha ka 10 tarik u Naitung, ha kaba u Myntri Rangbah u Conrad K. Sangma bad u Union DoNER Minister u Jyotiraditya M. Scindia ki la kdew ïa u sohtrun uba khlem ai dawai kum ka khana kaba seisoh ha ka jingdon ïa ka dor bad ka jinglah ban pynïasoh bad ki ïew ki hat. Kumba 50 ngut ki nongrep bad 50 ngut ki nongseng kam na Meghalaya ki la ïashim bynta ha kane ka tamasa kaba 3 sngi.
U Sangma ula ong, ba kane ka tamasa ka la kylla long palat ïa ka jingrakhe ïa ka jingrep sha ka rynsan kaba pynïasoh ïa ki nongrep beit beit bad ki nongthied bad ki nongkhaïi, ki nongsaiñ ïa ki marbam, ki kompani bad ki kynhun khaïi kiba heh.
Ka Meghalaya ka rep ïa u sohtrun ha ka jaka kaba palat 12,600 hektar, kaba pynmih palat ïa ka 1.4 lakh metric ton man la ka snem.
Ka jylla kaba pynmih khlem ka jingai dawai u jait sohtrun uba la tip kum u ‘Kew’, u dei uba la bna nam uba khlain ha ka jingthiang uba don kumba 18° Brix, ula kylla long syndon kum u u soh ba pawnam ka Meghalaya.
Ka sorkar ka la ong ba ka jingbei tyngka kaba ïaineh ha ka rukom saiñ bad ka ïew ka hat ka la kiew bha ha ka jingïohnong. Nalor u sohtrun uba lah pyntyrkhong bha uba la lah ban pynïaid ïew jan kumba 1,500 tyngka shi kilo ha ka dewbah Europe, katba u Individually Quick Frozen (IQF) Sohtrun u dei uba lah die ha ka dor 640 tyngka shi kilo, kaba pyni ïa ka jingïohnong bha ban ïa kaba shu die kumto ïa u soh uba im.
Ka jingpynmih ïa u sohtrun ha ka jylla ka dei mynta kaba la ioh ia ka jingkyrshan da palat 500 tylli ki kynhun jong ki nongrep, kaba wanrah lang ïa jan kumba shi lak ngut ki nongthung. Napdeng ki khana kiba seisoh ka dei ka Jirang Organic Agro Farmer Producer Company ha Ri-Bhoi, ha kaba 433 ngut ki nongrep ki la shalan sha ka Lulu Group, Reliance Retail, Safal bad Blinkit. Ka FPO ruh ka pynïaid nyngkong eh ïa ka umsoh u sohtrun uba na Meghalaya.
Ki sohtrun na Meghalaya ki dei ruh kiba la poi sha ki ïew ki hat ha Dubai, Abu Dhabi, Kuwait bad Sharjah. Ha u bnai ba lah dep, ka Myntri Pla Tyngka ka Ri ka Nirmala Sitharaman kala kaweh ïa ka lama kum ka jingphah shalan Ar Ton u sohtrun uba khlem ai dawai na Jirang sha ka Lulu Retail ha Dubai. Ka jylla mynta ka don ïa ka jingthmu ban wanrah shi lak hektar hapoh jong ka jingrep khlem ai dawai ne organic cultivation hapoh jong u snem 2028.
Naduh ba lah sdang ha u snem 2023, kane ka tamasa suki pa suki ka la sdang ban ïar bha. Ha u snem ba lah dep kala pynmih ïa ka jingseisoh ban ïatehkular ban pynïaid ïew da ka Reliance Fresh, Amazon Karigar bad Blue Tokai Coffee Roasters, kaba pyni ba kane ka tamasa kala nang kiew ha ka ban plie ïa ki ïew kiba thymmai na ka bynta ki jaka rep jong ka Meghalaya.