Mynjur ka Kynhun Myntri ban mang sa 36 klur ban pynheh ïa ka Second IT Park ha Umsawli

Shillong, Naitung 09 : Ka Kynhun Myntri ha ka sngi Balang ka la mynjur ban mang sa 36 klur tyngka ban pynheh bad pynbha ïa ka Second IT Park ha Umsawli, kaba la jan dep shna, ban lah ban pynbiang ïa ki jingdonkam jong ki kompani kiba kwah ban seng kam ha kane ka jaka.
Haba pyntip ïa kane hadien ka jingïalang jong ka Kynhun Myntri na ka liang u Myntri Rangbah ka jylla, u Conrad K. Sangma, u la ong ba ka jingtei ïa ka IT Park, kaba la mang palat 120 klur, ka la jan dep, hynrei dang don bun ki bynta kiba dei ban pyndep khnang ba ka jingïateh jingïadei bad ki kompani, khamtam ki kompani na shabar ri, kan long kaba seisoh.
U la ong ba katkum ka jingtyrwa jong ka Tnad Information Technology (IT), yn pyndonkam ïa ki jaka kiba dang lait ban shna ki plug-and-play office space, ban pynbun ïa ki jaka treikam, nalor ka cafeteria kaba heh bad ka auditorium ban pynbiang ïa ki jingdonkam jong ki nongtrei bad ki kompani.
U la ong ruh ba yn pynïoh ruh ïa ka centralised air-conditioning system, namar ba bun ki kompani kiba thmu ban wan seng kam ha Umsawli ki la pynpaw ba kane ka dei kawei na ki jingdonkam kiba kongsan.
U Conrad u la ong ba ïa kane ka jingmang pisa ba thymmai la dep ban bishar bad mynjur da ka Tnad Planning bad ka Tnad Finance katkum ki Schedule of Rates (SOR). Bad hadien kata la wanrah sha ka Cabinet ban ïoh ka jingmynjur.
U la pynkynmaw ruh ba katkum ka polisi ba thymmai jong ka sorkar jylla, kino kino ki projek kiba don ka jingkiew jinglut palat 25 persen ki dei ban wanrah sha ka Kynhun Myntri ban ïoh jingmynjur.
Hadien ka jingbishar bniah ïa baroh ki jingtip ba la aiti da ka tnad ba dei peit, ka Cabinet ka la ai jingmynjur ïa ka jingmang sa 36 klur ban pyndep ïa ki jingtei bad ki jingpynbha kiba dang sah ha ka Second IT Park.