Nongstoiñ, Naitung 09: Uwei u runar uba la donkti ha kaba leit kyndang ïa ka jaka shna taïar kali jong u bah Pynshlurlang Marweiñ ha ki khyndiat taïew ba la dep ha ka 6 tarik kaba dei ka lah sngi u blei u la leit ban pyndem noh ïalade ha khmat u trai jong katei ka jaka shna taïar.
U bah Marweiñ haba pyntip ha u nongthoh khubor u la ïahuh ba hadien ba utei u runar u la ïohi ïa ka dur khih kaba la ïohi lyngba ka CCTV ha ka por ba u leit kyndang ïa katei ka jaka shna taïar bad ba u trai u la phah sha ki lad pathai khubor da lade hi u la wan ban pyndem bad ïakren sngewthuh jingmut bad kyrpad ruh ba un sangeh noh ban leit mudui ejhar sha ki pulit.
Ha kajuh ka por u bah Marweiñ u la ïathuh ba u la phla ruh ba ha katei ka por u la leit tang marwei kumta hadien ba ki la ïakren sani halor katei ka kam u la map noh ïa utei u runar.
Kum ban pynkynmaw ba katei ka jaka shna taïar kali kaba don ha ka shnong Ktiehthawïar harud ka surok Riwang – Langja ka la shah kyndang la bun sien ha ki runar bad ki la ïoh ban rong bun tylli ki taïar kali bad kiwei kiwei ki tiar ba don kam kiba la shong dor da ki phew hajar tyngka bad dei halor katei ka nongrim ba utei u trai u la hap ban buh da ka CCTV ban lap lada dang don kiba wan kyndang bad dei ha ka sien kaba saw jong ka jngshah kyndang ba la ïohi ïa utei u runar uba leh ïa katei ka kam.
Wat la utei u runar u la phla ba u leit tang marwei ruh ym lah ban shu ngeit ïa kata. Kum ban pynkynmaw ba ha katei ka thaiñ naduh Nonglang haduh Mawsikar bad ki thaiñ Langpih dang ha u bnai Jylliew ba la dep ki la don ki nongtuh masi kiba la ïoh ban bat da ki paitbah shnong Mawsikar hadien ba ki la wan tuh ïa ki masi na katei ka shnong bad la suba ruh ba utei u runar u lah ban dei uba ïa don bynta lang bad ki nongtuh masi ruh.
