Pynthikna u Myntri Rangbah ban ym shah da lei lei ruh ban tih Uranium ha Meghalaya

Shillong, Naitung 8 : U Myntri Rangbah ka jylla u Conrad K Sangma ha ka sngi Balang ula pynthikna ba ka Sorkar Jylla kam kyrshan satia ïa ka jingtih Uranium ha Meghalaya bad ban jur ba ka ktien jong u kum u CM ka dei ban shim kum ka nongrim ba khatduh jong ka Sorkar halor kane ka kam.
Kane ka jingkynthoh kala mih haba jubab ïa ka jingkylli halor ka jingkynnoh ba hiar ki Heh ka Atomic Minerals Directorate (AMD) sha ki jaka ba don Uranium ha West Khasi Hills, kynthup ka shnong Domiasiat, wat hapdeng ka rai jong ka Sorkar ban ym shah da lei lei ruh ban tih Uranium hapoh ka jylla.
“Ha man ki jingkren jong ki bor sorkar sha ki lad pathai khubor bad wat haba kut u 2025, Nga kynmaw ba nga ong shai bha ïa kane ba ngim kyrshan satia ïa ka jingtih uranium. Ngi la kren shai halor kane bad ngi la kren shai sha ka Sorkar India ruh. Ngi la kren shai sha ki paidbah ruh” ong u Conrad.
U Myntri Rangbah ula ong ba ka lynti treikam ka Sorkar ka long ban tei ïa ka jingmynjur lang bad ym ban pynjari ïa ki rai ha u paidbah.
“Kam dei satia tang ka kam tih uranium. Lada phi peit ïa baroh ki rai ba ngi la shim, khamtam ki rai kiban ktah ïa u paidbah ba bun balang, ngi la kren shai ba ngin trei bad leh ïa ki kam kiba ïahap bad kaei kaba bha tam na ka bynta ki briew jong ngi” ula ong.
Haba kdew ïa ka lynti Rel kum ka nuksa, ula bynrap “Lada phi ïakren ia ka lynti Rel, ngi lah ban dei tang ma ngi ba haduh mynta ngim pat don ïa ka lynti Rel ban ïasoh bad ka Nongbah lane ki thaiñ kiba heh jong ka Jylla. Ka dei ka jingeh kaba khraw hynrei ngim lah ban shu leh da ka bor. Ngi la kren shai ba ngi dei ban shim lang ïa ka jingmynjur u paidbah haba ngi pynïaid shakhmat ïa kano kano ka kam” ong u Conrad haba ong ba ka kam tih uranium kala mih la bun sien bad la kyntait ruh man ka por ba ka mih.
Halor ka jingkynnoh ka KSU ba ki Heh ka AMD kila hiar man ka por sha Domiasiat bad kiwei ki jaka, u Conrad ula ong ba um pat ïoh jingtip ïa kum kane ka jinghiar hynrei ula kular ba un sa phah tohkit bad lada ka long kaba shisha un sa leh eiei halor kane ruh.
“Halor ka leit ka wan ki briew kiba rung bad ba mih, kane ka dei ka kam lada kano kano ka jingtip ka wan sha ka Ophis jong nga, lada phi pyntip ïa nga khlem pep ngin leh ïa kaba donkam. Ngam don jingtip satia ïa ka rung ka mih ki briew hynrei mynta ba phi la ïathuh ïa nga, Ngan sa wad jingtip bad ngin sa shim ïa ka sienjam kaba donkam” ula ong.
Haba kylli la ka Sorkar kan pyrkhat ban mynjur noh da ka Resolution ha ïing Dorbar Thaw Aiñ ban pynskhem ïa ka nongrim, u Conrad ula ong ba ka jingkren jong u hi ka dei kaba khia thew bha.