Na u Director ka tnad Urban Affairs dawa ka FKJGP bad KSU ban pyndam aiwai jaka ha Upper Shillong

Shillong, Naitung 08: Ka Joint Coordination Committee (JCC) jong ka Federation of Khasi Jaiñtia and Garo People (FKJGP) Upper Shillong Circle bad ka Khasi Students’ Union (KSU) Upper Shillong Circle ha ka sngi Balang ki la kynduh ïa u Director ka tnad Urban Affairs, PK Boro ban kyntu ba dei ban pyndam noh mardor ïa ka jingïasoi soskular ban aiti ïa ka jaka sorkar kaba heh kumba 13,181 square feet (tam ne duna) ha Upper Shillong sha ka M/S Ashok Auto Service & Partners.
Ha ka dorkhas ba la aiti ha u Director ka Urban Affairs Department, ka kynhun ka la ong ba katei ka jaka ka dei kaba la long trai mynshwa da ka Animal Husbandry & Veterinary Department hynrei la aiti noh sha ka Urban Affairs Department hadien ba la pynkynriah ïa ka Anjalee Petrol Pump namar ka jingthmu ban tei ïa ka flyover.
Haba kren bad ki lad pathai khubor, u President ka FKJGP Upper Shillong Bah Kitboklang Nongphlang u la ong ba ka M/S Ashok Auto Service & Partners ka la shimwai ïa ka jaka na ka Shillong Cantonment Board naduh ki snem kiba la leit noh ban pynïaid ïa ka Anjalee Petrol Pump.
“Kumta, lada donkam ban pynkynriah ïa ka petrol pump, ka jingïoh jaka thymmai ka dei ban long ka jingkitkhlieh jong ka Shillong Cantonment Board ym jong ka Urban Affairs Department,” u la ong.
Ryngkat ka jingdonlang u President ka KSU Upper Shillong Bah Shngainlang Sohkhlet na ka liang k JCC ka la dawa ïa ka Urban Affairs Department ba kadei ban pyndam noh mardor ïa ka jingai jaka.
La ïathuh ba ha ka jingïakynduh ïa u Director ha katei ka sngi kam shym la don satia kano kano ka jingkular ba ki ïoh halor ka jingdawa ba ki buh.