Shimrai ka SNSBH ban pyrshah jur ïa ka Amendment Bill 2026 jong ka KHADC

Shillong, Naitung 7: Ka Synjuk ki Nongsynshar Shnong ka Bri u Hynniewtrep ha ryngkat bad ka Synjuk ki Rangbah Kur ka Bri u Hynniewtrep kila shim ïa lai tylli ki rai ne Resolution ban pyrshah halor ka jingthmu jong ka Khasi Hills Autonomous District Council (KHADC) kaba thmu ban pynduh bor ïa ki Dorbar Shnong.
Ïa kane rai la shim ha ka jingiakynduh lang jong ka synjuk haba ki synjuk Rangbah Shnong na Kylleng ki jaka bad ruh na Ri Bhoi kila wan ban ia shim bynta lang bad kila kren sani bha halor kane ka amendment Bill 2026, ha ka jingialang ba la pynlong ha Jaiaw Lumbatemon.
Haba kren bad ki lad pathai khubor hadien ba la wai ka jingïalang u Bah RL Blah uba dei u President jong ka Synjuk ki Nongsynshar Shnong ka Bri u Hynniewtrep u la ong, “Ngi la shim rai ban pyrshah ïa ka amendment Bill 2026 jong ka Khasi Hills Autonomous District Council bad dawa ruh ban weng noh ïa ka notification”.
“Ka rai kaba ar ka long ban pynphai biang ïa ka bill bat ban thoh sha baroh baroh ki shnong ki thaw ryngkat bad ki Hima ban ïatrei lang bad ban ai da ka jingthoh sha u Lat ka jylla bad kumjuh ruh sha u Myntri ka tnad DCA bad ngin kynduh ruh ïa u Myntri Rangbah ka jylla” ong u Bah Blah.
Ïa kane ka Resolution ngin ai copy lang ruh sha u Chief Executive Member (CEM) jong ka Khasi Hills Autonomous District Council (KHADC) u Bah Winston Tony Lyngdoh, u la ong.
Shuh shuh u Bah Blah u la ong ba ka dawbah jong ka jingpyrshah halor ka amendment Bill caluse 16 ba la weng noh ïa ka kyntien ‘inconsultation’ bad ki Dorbar Shnong, ki Dorbar Raid bad Dorbar Hima.
“Katkum ba kren u Executive Member u la ong ba man ka por sha ka por la ïa kren ïa kane ka mat hynrei khlem poi shaei shaei ka slem, Ngi ngim pyrshah ïa ki rai jong ka District Council ngi don ryngkat haba ïadei bad digitalise ïa kine ban ïada ïa ka khyndew ka shyiap ngi don lang ryngkat bad ki” ong u Bah Blah.
Shuh shuh u Bah Blah u la ong,”Hynrei ban ong pat ban gin ym shim shuh ïa ka consultatioh ne ïamir jingmut bad ngi ki dorbar shnong bad kumjuh ruh ïa ki Dorbar Hima bad Dorbar Raid ïa kane te ngim lah ban pdiang namar haduh mynta mynne lada phi leit mynta ka registration ha ka jylla hapoh ka tnad Revenue ki pynshong nongrim halor ka dulir ka pata ba soi da u Rangbah Shnong ka don ka iktiar ha ka, hynrei kumba long mynta ïa ngi ym ithuh shuh bad yn leh beit da ka District Council bad kane ka daw ba ngi pyrshah namar ïa kaba lah don ieh kan sah beit kumto”.
Haba kylli, u Bah Blah u la ong ba lada kim khot ngin ym leit ban pan jingshai namar ba ki shim ïa ka rai khlem pyntip lang ïa ruh bad ha ka jingshisha kila dei ban khot lang em.
Na ka liang u Bah Bantylli Nari uba dei u Rangbah Shnong ka Dorbar Shnong Nongrim Hills uba dei ruh u President jong ka Synjuk ki Rangbah Nongthymmai Pyllun u la ong, kaba kongsan mynta ka long ban pynsangeh ïa ka jingmynjur jong u Lat ka jylla namar ba ïa kane ka kam kila leit sha ka tnad DCA lah palat ar taiew.
“Kaba kongsan eh ka long ban pynsangeh ïa u Lat ka jylla bad ban pynsngewthuh ha u Lat ïa ka jingshai ha u Latt halor kane bill ba u Lat ka jylla un ym ai ïa ka jingmynjur ba kan ym long aiñ bad ngin sa kynduh ruh ïa u Myntri ka tnad DCA bad lada don ka jingkhot na KHADC ngin sa ïa peit bad ïa pyrkhat” ong u Bah Nari.