400 tylli ki skul LP bad UP jong ka sorkar ki ïoh ban pynlang umdih na u slap ha WGH

Tura, Naitung 7: Kumba 400 tylli ki skul Lower bad Upper Primary jong ka sorkar bad ki skul SSA ha West Garo Hills ki la long ba la khreh ban pynbiang ïa ki kor ki bor ban lum um slap bad ki ramp kum shi bynta jong ka jingpynbor ba thymmai jong ka sorkar Meghalaya ban pynkhlain ïa ki jingtei jong ki skul.
Ka Ophis jong ka District Mission Coordinator, Samagra Shiksha, West Garo Hills, ka la bthah ïa baroh ki skul kiba dei hok ban sdang noh mardor ïa ki jingtrei hadien ba la ïoh ïa ka jingmynjur katkum ka Project Approval Board (PAB) 2026-27.Ia ki projek la buh ban pyndep ha u bnai Nailar 2026.
Kane ka jingthmu ka long ban pynlong ïa ki skul kiba kham suk na ka bynta ki khynnah kiba don jingduna ha ki dkhot met katba ka dang kyntiew ïa ka jingpynneh pynsah ïa ka um kaba neh.Yn buh ïa ki kor lum um slap na tnum ïing, kynthup ïa ki nala um, ki pipe ba tuid um shapoh, ki jaka pynkhuid bad ki jaka buh ne pyndap um, katba ïa ki ramp ryngkat bad ki jingbat kti yn shna katkum ki kyndon ba la buh ban ioh rung khlem jingkhanglad ban pynthikna ïa ka jingsuk ban rung sha ki kamra klas.
La bthah ïa ki heh jong ki skul, ki Junior Engineer bad ki Cluster Resource Coordinator ba kin buddien bha ïa ka jinglong jingman bad ka jingpyntrei ïa ki kam ha ka por kaba biang.
Ki skul kin hap ruh ban aiti man la u bnai ïa ka kaiphod jong ka jingkiew shaphrang jong ka kam bad ka pisa tyngka, ryngkat bad ki dur ba la shon, ha ka por bad hadien ba la dep pyndep ïa ki projek.
Ynda la dep, yn hap ban aiti ïa ka syrnod jong ka jingpynshisha bal ah pyndep ïa ka kam, ki jingthoh ha ka jinglut jingsep, ki bill, ki voucher bad ki jingtip ba bniah jong ka bank account na ka bynta ban pyllait ïa ki jingsiew pisa.
U Myntri Rangbah ka jylla u Conrad K. Sangma u la pynpaw bunsien ïa ka jingangnud jong ka sorkar ban pynbha ïa ki lad pule puthi.
“Ka jingthmu jong ngi ka long ban pynthikna ba uwei pa uwei u khynnah un pule ha ka skul kaba don ki jingtei kiba kham bha, ki lad ki lynti kiba kham bha bad ka jaka pule kaba biang.Ngi pynlong ïa ki jingbei tyngka kiba neh ban pynkylla dur ïa ki skul sorkar ha kylleng ka Meghalaya,” ong u Myntri Rangbah ka Jylla.
Ki heh ophisar sorkar ki la ong ba kane ka jingthmu ka dei shi bynta jong ka jingpyrshang kaba kham heh jong ka jylla ban pynthymmai ïa ki skul sorkar da kaba thaw ïa ki jaka pule kiba kham shngaiñ, kiba kham kynthup lang bad kiba lah ban pynneh pynsah ïa ka mariang na ka bynta ki khynnah skul.