Shillong, Naitung 7 : U Nongïalam ka BJP bad MLA ka Pynthorumkhrah u bah AL Hek u la kob mynta ka Sngi Ba Ar ba u snem 2028 un dei u snem jongka BJP ha Meghalaya namar ha utei u snem ka party kanjop bun ngut ki MLA ka ban dei ruh ka sien kaba nyngkong eh ba kan jop bun ha Meghalaya.
“ Ngeit ïa nga u 2028 un dei u snem ba ka BJP kan ïalam ïa ka jinsynshar ha Meghalaya bad kane ka long kaba thikna bha . Ki Nongïalam ka party na Delhi kin sa rai mano ban ialam ia ka party ne mano ban shimti ïa ka kam Myntri Rangbah ka jylla ha u 2028” ong u bah Hek.
Halor ka jingkylli hato ka BJP kan ïateh paralok lypa bad kano kano ka party shwa ka election u la ïathuh ba kat haduh mynta ka BJP ka pynkhreh beit ban ïkhun marwei.
“ Ngin ïakhun marwei ha kane ka election bad ym ym ïatrei lang bad kano kano ka party shwa ka election” ong u bah Hek.
Haba kylli hato kan don ka jingpynkylla nongïalam ne President ha ka BJP shwa ka election, u bah Hek u la athuh kane ka shong ha ka jingpeit jong ki nongïalam na Delhi.
Halor ka jingkylli hato un ïa aireng ne em ha kane ka by election MP sha Lok Sabha, na ka liang u bah Hek u la ïathuh ba un ym ïa aireng satia.U la ïathuh hooid na ka liang ki nongïalam ka party ki la wan ïakren bad u ba un ïa khun ïa ka bye election hynrei u la kyntait namar u don kiwei kiwei ki kam ban leh.
“ Ha kaba sdang eh ki nongïalam ki la wan pynbor ïa nga ban ïakhun ïa ka bye election hynrei nga la kyntait namar ka pynpaw ha ki ba ki dang don kiwei kiwei ki kam ba nga hap ban pyndep kumta ngam lah satia ban ïakhun ïa ka election. Kaba sah mynta ka shong ha ka party ïano kan pynïakhun” ong u bah Hek.
U la ïathuh, na ka liang jongu u la tyrwa ïa ka kyrteng jong u bah Sanbor Shullai, MLA ka South Shillong Constituency bad mynta ka shong ha u la un pdiang ne em ïa kane ka jingtyrwa.
