Kumba la kular sha ki paidbah ngin ym shah da lei lei ban tih Uranium: EM Land

Shillong, Naitung 06: U Executive Member jong ka KHADC u Bah Powell Sohkhlet ha ryngkat ka jingdonlang u nominated MDC u Bah Mathew Makdoh na Nongpoh u la ong ba ka jingmynjur jong ka dorbar ka KHADC ïa ka Khasi Hills Autonomous District (Regulation and Administration of Land) Bill 2026 ka long ban tehlakam ïa ka jingïoh thied jaka ba khlem buh pud ne ceiling jong ki riew shimet heh spah ïa ki jaka paidbah ne ri raid bad ha kajuh ka por ban ai lad ruh ïa ki longïing kiba duk ki bym don lyngkhot jaka ba kin ïoh lad ban shna ïa ki ïing jong ki ha ki ri raid.
Haba kren sha ki lad pathai khubor halor ki jingmih ki jingbym sngewthuh ne shah pynsngewthuh bakla halor kane ka Bill kaba ïadei bad ka jingbuh pud ne Land Ceiling bad kumjuh ruh ka jingweng ïa kata ka jingïasyllok ne ka Consultation na ki Hima, ki dorbar shnong ne dorbar raid, u EM u la ong ba haba ïadei bad ka jingbuh pud ban ai jaka ne kata ka Land Ceiling ka long ban tehlakam na ka jingsyntuid noh ki jaka paidbah tang sha ki riew shimet ban thied katba mon, bad halor ka jingweng noh ïa ka jingdonkam ban ïasyllok shwa ban ai ïa ki jaka ka mut tang na ka bynta ban pynsted ïa kane ka jingmynjur ïa ka Bill, namar lada hap ban leit ïasyllok sha baroh ki shnong ki thaw, ki hima, ki raid kan sa shim ïa ka por katba ki jaka pat ki la nanglut nanglut, kumta la wengnoh ïa kane ka kyntien Without Consultation hynrei pat u la ong ba ki dorbar shnong ki hima ki don beit la ka jong ka bynta ban leh.
Lah ban ong ba ka jingwengnoh ïa ka kyntien “consultation” ka la mih ka jingkynthoh ia ka Bill ha kaba la kynnoh ba ka KHADC ka la pynduh bor ïa ki nongsynshar shnong kum ki Dorbar Shnong bad Hima ïa ka bynta kaba kongsan haba ïadei bad ka jingïa ai jaka.
U Powell Sohkhlet u la ong ba ka kyndon kaba ïadei bad ka jingïasyllok hapoh ka Section 16 jong ka principal Act ka pynneh kyrpang halor ka jingbuh ryntih ïa ka jingai jaka, kaba dei ka kam kaba la dep ban don bynta ban ïasyllok bad ki nongsynshar hima bad ki dorbar shnong naduh u snem 2021.
U la ong ba ka jingkulmar ka mih na ka daw ka jingwengnoh ïa ka kyntien ‘consultation’ na ka amendment.
U la ong ba ka KHADC kam don ka jingthmu ban pynduh ïa ka bor ki khlieh nongsynshar kum u Dorbar Shnong, Dorbar Raid bad Dorbar Hima, hynrei kin ïai bteng ban trei ïa ki kam kiba kongsan haba ïadei bad ki jaka puta, kynthup ki jingpynithuh bad ki jingai jaka.
Lyngba kane ka aiñ ka jaka ba duna tam ba lah ban ai ka long na ka 2 akar na ka bynta ki homestay sha ka 15 akar ïa ki university campus.
Na ka bynta ki Karkhana, resort/hotel ka land ceiling ka dei 4 akar, ki sports academy/stadium/sports complex, religious institution, commercial establishment kadei 5 akar bad ki hospital/nursing home bad wellness centre/cash crop plantation ka ceiling ka dei 12 akar.
Haba phai sha ka jingdonkam kane ka Bill u Bah Sohkhlet u la ong ba lada la ïoh jingmynjur ïa kane ka bill kan long ka jingpyrto ïa ki pateng ban wan haba ïadei bad ka jingshngaiñ ka khyndew ka shyiap.
Katba u Bah Makdoh uba long u Nominated MDC u la ong ba ka jingwan rah ïa kane ka Bill ka long ban pyndep jingkular ka VPP sha ki paidbah ban ïada ka khyndew ka shyiap da kaba bynrap ruh ba bun na ki ri raid ki la kylla long sha ki jaka ki riew shimet ne ki jaka ki heh spah, kumta kan long kaba ma lada ym lah ban tehlakam lypa naduh mynta ïoh ki pateng ban wan kin ym ioh jaka ne khyndew ka shyiap la jong.
Ha kawei pat ka liang, ha kaba ïadei bad ka jingkwah ka seng KSU ban wanrah da ka Resolution hapoh Ïingdorbar KHADC ban ym shah shuh syndon ban tih Uranium ha Domiasiat bad kumjuh ruh halor ka kynnoh ba don ki heh spah ne ki nongmihkhmat kiba thmu ban wanrah biang ïa ka UCIL, u Bah Sohkhlet u la ïathuh ba ka EC kan sa pynbeit ban kynduh ïa ka KSU bad kumjuh ruh ban pan ïa ki kaiphod ha shwa ban pynlong ka jingtohkit kaba bniah halor kane ka kam bad kumjuh ruh u EM u la ong ba ka EC jong ka VPP kan ym shah da lei lei ruh em ban khlong ïa u Uranium sha katei ka thaiñ Wahkaji bad ka EC kan ym peit satia ruh ïa ka khmat lada poi ki jingpan jingbit, naba ïa kane ka jingpyrshah la lam khmat hi da u President ka Seng Voice of The Peoples party (VPP) u Bah Ardent Miller Basaiawmoit naduh mynshwa bad haduh mynta ruh.