Da ka Komiti thaw ka MSPCB ban weng ïa ka jingjaboh ha Byrnihat bad kiba leh tam ki dei ban ngat

Nongpoh, Naitung 06: U Myntri Sorkar jylla ba dei peit ïaka tnad C&RD ba dei ruh u MLA ka Jirang Constituency u Bah Sosthenes Sohtun, mynta ka sngi u la lum da ka jingïalang kaba kyrpang hapdeng ki ophisar ka tnad Meghalaya State Pollution Control Board, Meghalaya Industrial Development Corporation Limited, ki nongmihkhmat naka Byrnihat Industries Association, ki nongïalam shnong ban ïathir bad ïatai naka bynta ban weng ïaka jingeh ba ki paidbah ki ïakynduh ha kaba ïadei bad ka jingjaboh kaba shyrkhei bala kynnoh ba ka mih na ki karkhana kiba don ha EPIP Byrnihat bad dang shen kaba la ioh nam ruh kum ka jaka ba jur tam ka lyer jaboh.
Ïa katei ka jingïalang la pynlong ha IB jong ka MeECL kaba don ha Byrnihat ha kaba la sakhi ruh da ka jingdonlang u R Nainamalai Chairman ka MSPCB, u Dr. Abhishek Saini Deputy Commissioner ka Ri-Bhoi, u Giri Prasad Superintendent of Police ka Ri-Bhoi, u Dr. DH Chyrmang Member Secretary ka MSPCB, ki ophisar bad scientist naka MSPCB, MIDC, PWD bad kumjuh ruh ki nongïalam shnong hapoh ka lama ka Synjuk ki Rangbah Shnong Byrnihat Area.
Ha kane ka jingïakynduh lang kala don ruh ka jingïatai hapdeng ki nongïalam shnong kiba la pynpaw ïala ki jong ki jingeh ha kaba kila kynnoh ruh ba ki ophisar ka tnad MSPCB kim iohi ïaki jingeh jong ki paidbah namar ki leit ki wan da ki kali ba don AC bad kim iohi kaei kaba ki paidbah ki mad namar kitei ki karkhana tang shu ioh jingtip ba don ki ophisar ka MSPCB ba wan kila nang kumno ban pynduna ïaka lyer jaboh kaba mih naki karkhana, bad nalor kata kila kynnoh ruh ba ki jingthung jingtep kim long shuh bad ki paidbah ki ioh pang khamtam ka TB bad bampong ka jur ha katei ka thaiñ bad teng teng lei ka wan ka jingsma kaba shyrkhei na kitei ki karkhana.
Na ka liang ki ophisar ka MSPCB hadien ka jingïatai bad pyni ïaka jinglong jingman ka thaiñ Byrnihat kila pynpaw kim shym la shongthaid ban ïakhun ïa katei ka jingeh bad khnang ban ioh ka jingujor kaba markhmat naki paidbah ne ki nongïalam shnong naka liang ki ophisar katei ka tnad kila thaw ruh ïa kawei ka Committee ba ki paidbah kin ioh ban phah beit ïaki jingujor lyngba ki dur bad ki video sha ka tnad MSPCB khnang ba yn ioh leh ïa kaba donkam bad hakajuh ka por la donkam ruh ban buh da ka Regional Office haka thaiñ Byrnihat ban pynsuk ba ki ophisar ka tnad MSPCB kim donkam shuh ban wan naduh Shillong ha kaba naka liang u Myntri u la kular ban shimkhia ban ïakren bad u Myntri Rangbah halor katei ka jingdonkam.
Katba ka kynhun jong ka Byrnihat Industries Association kila pynpaw ba baroh ki dur ki dar kiba mih haki lad pathai khubor ki dei kiba ïalam bakla khlem da pynshisha bad pynthikna ba ka Byrnihat mynta kam dei shuh kaba nyngkong haka jingjaboh namar kum ki karkhana kila ïaleh katba lah ban pynduna hynrei kaba bun haki ka jingjaboh ka dei kaba wan na Assam namar ki karkhana ki don mar syndah ha khappud ka Meghalaya bad Assam haka thaiñ Byrnihat.
Haba kren sha ki lad pathai khubor hadien ka jingïalang naka liang u Bah Sosthenes Sohtun kum u myntri sorkar u la ong ba ka Byrnihat kam dei ka sien ba nyngkong ba kala mih kum ka jaka ba jaboh tam, ha kaba naka liang ki ophisar ka MSPCB bad wat ki karkhana kila pyni ïala ki jong ki jingbatai kumno ka lyer ha Byrnihat bad wat ki nongïalam shnong kila pynpaw ïaka jingsngew jong ki ha kaba ïadei bad ka jingjakhlia bad ka koit ka khiah kaba ktah ïaki nongshong shnong ka thaiñ Bynrihat.
Shuh shuh u la ong ruh ba ha katei ka sngi la ioh ruh ban ïatai ba ki karkhana kim dei shuh ban pyntuid jaboh sha Wah Umtrew bad kumjuh ruh haba ïadei bad ka jingsma kaba mih la kyrpad ïaka tnad MSPCB ba ki dei ban pynlong ka jingwad bñiah ban lapdien mano ba pynmih ïa katei ka jingsma.
U la ïathuh ruh ba naka bynta ban tehlakam ïaka jingleh tam jong ki karkhana, naka liang ka MSPCB kala thaw ruh kawei ka Committee bad ki nongïalam shnong ba lada ki don kino kino ki karkhana kiba pynkheiñ aiñ ki lah ban shondur bad ring video bad ban phah sha ka kynhun ka MSPCB ban ioh leh ïa kaba donkam.
Shuh shuh ha kaba ïadei bad ka jingdawa ban don ka Regional Office ka MSPCB ha Byrnihat khnang ban lah ban peitngor ïaka jingmih ka tdem jakhlia, naka liang u myntri u la kular ban buh ka jingthoh sha u Myntri Rangbah bad kumjuh ruh ban don ka jingïakynduh bad jurip lang ruh bad ki bor jong ka Assam namar ki karkhana ki don bun ruh sha Assam ban long ka jingïada ïaki paid nongshong shnong namar ka thaiñ Byrnihat kam dei tang ha Meghalaya, u la bynrap.