Nongpoh, Naitung 06: Hadien ka jingkynnoh jong ki nongïalam shnong ba kynrei ka jingpang TB bad bampong bad kiwei ki jait jingpang haki shnong haka thaiñ Byrnihat haka jingïalang kaba la long mynta ka sngi hapdeng u Myntri sorkar, ka tnad MSPCB, MIDC, ki bor district, kumjuh ruh ki Nongïalam shnong hapoh ka lama ka Synjuk ki Rangbah Shnong Byrnihat Area, naka liang u Bah Sosthenes Sohtun Myntri sorkar ba dei ruh u MLA ka Jirang u la bthah ïa u Deputy Commissioner ka Ri-Bhoi District u Abhishek Saini ba ka tnad ka koit ka khiah ka dei ban pynlong ka jingwad bñiah bad ka jingtohkit halor katei ka jingujor ki nongïalam shnong.
Bun na ki nongïalam shnong kila pynpaw ba katto katne ki paidbah ki don hapdeng ka jingthiah pang, bad kila kynnoh ba kane ka jingpang ka lah ban dei beit naka jingjaboh ka thaiñ Byrnihat namar ka jingpum pum haba ring mynsiem bad ka jingsop ki tdem iong sha ki iing briew kiba wan na kitei ki karkhana.
Na ka liang u Myntri u la ong ba ka tnad ka koit ka khiah ka dei ban pynlong ka jingwad bñiah bad kumjuh ruh ban ai ka kaiphod haba ïadei bad katei ka jingkynnoh, la kitei ki jingpang ki dei naka jingjaboh ka lyer ha katei ka thaiñ ne kim dei.
