Ka Sorkar ka don ha syndah bad ki paidbah yn ym shah tih Uranium ha Meghalaya : Sniawbhalang Dhar

Shillong, Naitung 6 : U Symbud Myntri Rangbah ka jylla u Ma Sniawbhalang Dhar mynta ka Lah Sngi U Blei u la kren shai ba ka sorkar ka don ha syndah bad ki paidbah bad da lei lei ruh ym ym shah ban tih Uranium ha Meghalaya lada ki \paidbah ki ïeng pyrshah.
U la ong ba ka sorkar ka ïeng ha syndah ki paidbah halor kane ka kam bad kan ym don kano kano ka rai da kumwei pat hynrei ban ym shah ban tih ïa une u mar poh khyndew ha kane ka jylla.
“ Ngi kren da kaba shai. Ngin ym shah tih Uranium namar ka sorkar ka don ryngkat bad ki paidbah la ka long kumno kumno ruh ngin ym shah bad ngin ïadon ryngkat beit bad ki paid nongshong shnong ka jylla” ong u ma Sniawbha haba ïakren bad ki Nongthoh khubor.
Kane ka jingkren jongu ka long halor ka jingkynnoh jongka KSU ba ki don ki MLA kiba rim kiba kwah ban thied jaka ha ka dor kaba tad bha ha Domiasiat bad kine ki pyrshang ruh ban pynsngewthuh bakla ïa ki paidbah ba kin pdiang ban tih Uranium.
“ Hooid ngam ïoh jingtip shaphang kata hynrei kumba ngi la pynpaw naduh kaba sdang ngin ym pdiang ne shah ïano ïano ruh ban tih ïa u Uranium hapoh ka jylla” ong u ma Sniawbha.
Halor kine ki jingkynnoh ba ki don kita ki MLA ba rim ba thmu thied jaka ha Domiasiat, u la ong ka sorkar kan sa tohkit bniah ïa kane ka kam.
“ Lada ka don shisha kum kata kumba la kynnoh ka sorkar kan tohkit bniah bad lada lap ba ka don shisha ka jingthmu ban pynkohnguh ïa ki paidbah ban tih Uranium ka sorkar kan leh da kaba tyngeh kat kum ki kyndon aiñ” ong biang u Symbud Myntri Rangbah.
Halor ka jingkynnoh ki trai shnong ba ka sorkar ka leh klet ïa ka roi ka par ha ka thaiñ u Ma Sniawbha u la kyntait ïa kane da kaba ong “ Kata ka long kaba bakla, namar ha kano kano ka jaka ba ka sorkar ka wanrah ïa ka roi ka par kam don kano kano ka jingthmu ha lyndet jongka roi ka par. Ka roi ka par ka mut ka roi ka par jong kano kano ka thaiñ namar ka sorkar kam thmu ban wanrah ïa ka roi ka par tang ha katei ka thaiñ ba don u Uranium hynrei ha baroh kawei ka jylla bad ka peit ruh ba kan long mar kumjuh.
Halor ka jingkynnoh ba sniew palat ka surok bad bym biang ka jaka ai jingsumar u ma Sniaw u la ong ba ka sorkar ka pyrshang katba lah ban pynbiang ïa ki surok bad ïa ki jaka ai jingsumar bad ïa kane ruh yn leh ha baroh kawei ka jylla.
“ Hooid ka surok ka don bad ka sorkar ka pyrshang katba lah ban pynïoh ïa ki surok kiba bha ban suk ka leit ka wan Hooid ngim lah ban ai ïa ki surok kiba bha tam sha baroh hynrei ka sorkar ka pyrshang hi katba lah ban pynbiang ïa ki surok ki ban pynsuk ïa ka leit ka wan bad ka kit ka bah jong kano kano ka thaiñ” pynkut u ma Sniawbha.