Sdang ka Behdieñkhlam ka Seiñraij Jowai bad pynpoi ïa ka ‘Symbood Khnong’ ha ‘Loom Soo-ïung’
Jowai, Naitung 06: Ka lehñiam Shad Behdeiñkhlam jong ka Seiñraij Jowai kaba la tip kum ka ‘saw sngi lai miet’ kala sdang mynta ka sngi (Pynsiñ) jong ka 6 tarik hapdeng ka jingiphuh iphieng ha ryngkat ka jingrisa bad ka jingud ka Bom ka Bhuri da ka jingïashim bynta ki khun ka Chilliang Raij (Khon Raij) ban leit rah ïa ka “Symbood Khnong” bad pynpoi ïa ka ha ‘Tre Kjat Loomsooïung’ New Hill Jowai.
Ïa ka lehñiam Behdeiñkhlam mynta ka sngi la sdang naduh ka por mynstep, ha kaba la don ka bam Tyngkong ha ‘Iung Langdoh’ nangta ki khun ka Seiñraij Jowai kila pynkhreh ïa ka Siang ka Pha ban pyndep da ka kmie jong ka ïing kum ka jingburom ïa kiba la khlad na sla jong kane ka pyrthei.
Katba ha ka por janmiet ki khun ka Chilliang Raij (Khon Raij) kila leit rah ïa ka “Symbood Khnong” ha ryngkat ka shad ka kmen, ka pud ka tem ha shi lynter lynti haduh ban da poi ha New Hill Jowai.
Na ka liang u Dolloi ka Eleka Jowai u ma Puramon Kynjing ula ong kane ka sngi Pynsiñ ka long ka jingwan ki Sangia, ki Blei ki Syiem bad ki bor ki jingkyrkhu ha ki briew ban pyndep ïa ka ñiam ka rukom ha ki ïing ki sem, haka shnong ka thaw bad ha ka Raij ka Muluk ban pynpaw ka jingsngewnguh ïa ki jingkyrkhu kiba u Tre Kirot uba la seng ïa ka shnong Jowai lyngba ka Bon, ka Teiñ, ka Wet bad ka Doh.
Ha ka juh ka por u ai khublei Behdieñkhlam basuk bakmen ïa baroh ki khun ka Raij bad ka shnong ka thaw baroh kawei, da kaba ong ka jingpyndep ïa kane ka lehñiam yn wanrah ka jingkyrkhu haka shnong ka thaw, haka Raij ka muluk kumjuh ruh ban kiew ka imlang ka sahlang.
Lashai ka sngi ba ar kaba dei ka ‘Mulong’ jong ka 7 tarik naduh ka por mynstep u Dolloi, u Langdoh bad ki Waheh Wasan kin sdang ïa ka nguh ka dem ha ka “Syiem Aitnar” hapoh ka jingpynlut pynsep jong u Dolloi.
Ha ka por jainmiet baroh ki Kmai Raij naduh ka dong Panaliar, Dulong, Lumpyrdi ïongpiah, Lumïongkjam, Tpep-Pale, Lumkyrwiang kin pynpoi ïa ki Deiñkhlam ha Iawmusiang ha ryngkat jingshad jingkmen, katba ki khun ka Raij kin pynpoi ïa ka ‘Khnong Blai’ ha Loo Sooïung.