Shillong, Naitung 06 : U Symbud Myntri Rangbah ba khmih ïa ka Tnad Urban Affairs u Ma Sniawbhalang Dhar ha ka Lah Sngi U Blei ula ong ba ka Sorkar Jylla ka kyrmen ban lah shim rai khatduh noh ïa ka jingtyrwa pynkynriah ïa ka Them Metor na Them Iew Mawlong hashuwa ban kut une u bnai.
U Ma Sniawbha u ïathuh ba ka dang sah sa kawei ka jingïalang hashuwa ba ka Sorkar kan shong bishar ïa ki jingtip ba ka ïoh khatduh.
“Ngi don jingthmu hashuwa ban kut une u bnai. Ngin dang ban ïashong sa kawei ka jingïalang bad ngin sa shim ïa ka kaiphod kaba dei thik ïa kane ka kam. Lehse ngin sa ïoh ïa ka kaiphod ba khatduh” ula ong haba ïakren bad ki nongthoh khubor.
Kat kum ka jingong jong u, kawei na ki lad ba ïakren ha ka jingïalang ba khatduh ka long ban kyrpad ïa ka jaka na ki bor shipai ban pynkynriah ïa ka Them Metor.
Ka Sorkar mynta ka dang ap ïa ka jingaiktien na ki heh shipai hadien ka jingïalang ba la pynlong ha ki kyrdan bapher bapher.
“Ngi dang ap ïa ka jingïakren ba khatduh hapdeng ka Sorkar bad ki bor shipai. Kumta, to ngin kyrmen ba hashuwa ban kut une u bnai ngan sa lah ban ïasam jingtip haba ïadei bad kaei kaba long ba man mynta jong ka kam Them Metor” ula ong.
Halor ka jingheh ka jaka ba pan, u Ma Sniawbha ula ong ba kam pat don ka jingïakren ïa ka jingheh ka jaka katba ka jingïakren kan dang long shwa tang ban ïoh ïa ka jaka bad ïa kiwei yn sa iakren hadien.
“Ngin shym la pan katno. Ngi hap ban ïakren shuwa. Lada ki long ba kloi, ngin sa ong katne ka jaka ngi kwah. Ngi la dep ithuh 2-3 tylli ki jaka hynrei haduh mynta ngim pat ïoh ktien eiei na ki shipai, namar wat u Myntri Rangbah ula ïashong jingïalang kumba 2-3 sien bad u Myntri kam ïada Ri” ula ong.
Haba kylli ia ka Blueprint bala pynkhreh da ka Sorkar ban pynkynriah, u Ma Sniawbha ula ong ba kane kan dang ïai don ha ka miej, hynrei ka Sorkar kala buh ruh ïa ka jaka shipai kum kawei pat ka lad.
