SHILLONG, Naitung 05: Ka Damerbha Rumnong ka la shah thung kum ka Khlieh jong ka UJAI Northeast ha Meghalaya bad ka la shah kyntiew kyrdan sha ka Blue Belt, kaba pynlong ïa ka kaba nyngkong eh ha ka thaiñ ban ïohpdiang ïa ka kyrdan Blue belt ha ka Brazilian Jiu-Jitsu (BJJ).
Ka Damerbha kadei ka nongïalehkai Mixed Martial Arts kaba la pyntbit bha ïalade, bad ka don ha ka kyrdan ba nyngkong ha India bad ba 8 ha Asia ha ka kyrdan jingkhia ba ka ju ïakhun. Ka la buh ban pynsah nam ïalade ha ki rynsan ïalehkai combat sports, kynthup ïa ka jingjop ïa ka takma Ksiar ha ka AJP Abu Dhabi Jiu-Jitsu Pro Championship ha New Delhi.
Ka la don bynta ban seng ïa ka IDM Fitness bad ka Fight Club ryngkat bad ki paralok ba kynthup ïa u Mayveen Sawkmie bad u Iarapborsing Kharbani.
Ka jingkiew jong ka kum ka khlieh duh jong ka UJAI Northeast bad sha ka blue belt ka pynpaw ïa ka jingnang roi jong ka jingïalehkai BJJ hapoh ka imlang ka sahlang, kaba ai ïa ka nongrim ba pura na ka bynta ka jingïalehkai kaba nangroi.
Ha ryngkat ka Damerbha, baroh arngut u Mayveen Sawkmie bad u Iarapborsing Kharbani ki la shah kyntiew kyrdan sha ki ar tylli ki stripes ha ka white belt jong ki, kaba pyni ïa ka jingkiew stet jong ki, ka jinglong ryntih, bad ka jingaiti lut jong ki ha kane ka jingïalehkai.
Hapoh ka jingïalam jong ka Damerbha ha ka IDM Fitness bad ka Fight Club, kane kan plie lad ïa ka pateng kaba thymmai jong ki nongïalehkai combat sports kiba mihkhmat ïa ka thaiñ shatei lammihngi ha ki rynsan ïalehkai ba kham heh.
