Jowai, Naitung 05: Ki ar tylli ki skul napoh ka West Jaiñtia Hills District kin ïoh ban mihkhmat ïa ka District sha ka State Level, haka lympung Inter School Subroto Mukherjee Cup Football Tournament 2026’ ka ban sa long shen ha nongbah Shillong.
Haba phai sha ka jingïakhun phainal mynta ka sngi jong ka ‘District Level Inter School Subroto Mukherjee Cup Football Tournament 2026’ bala pynlong ha Wahiajer Multi Sports Complex bala pynïaid da ka ophis u District Sports Officer, West Jaiñtia Hills District Jowai.
Haka jingïakhun jong ka kyrdan Under-17 (Girls) ka North Liberty H/S School Jowai kala pynliem da 5-0 kol ïa ka H.K Singh Memorial Secondary School. Ha ka Under-15 (Boys) North Liberty H/S School Jowai kala pynliem da 1-0 kol ïaka Jowai Govt. Boys’ Higher Secondary School.
Katba haka jingïakhun jong ka kyrdan Under-17 (Boys) ka Amwi Higher Secondary School, Thangbuli kala jop da 1-0 kol ïa ka Saw Lyngdoh Higher Secondary School, Mookaiaw.
Da kane ka jingjop jong ki ka North Liberty H/S School Jowai kan ïoh ban leit ïakhun sha ka State Level haka kyrdan Under-17 (Girls) bad ka Under-15 (Boys), katba ka Amwi Higher Secondary School, Thangbuli haka kyrdan Under-17 (Boys).
Ïa ki khusnam sha ki nongjop la sam da u kongsan jong kane ka sngi ha ryngkat ak District Sports Officer ka kong Linza F. Syiem ki dkhot ka WJDSA, nalor kiwei kiwei de.
