La plie paidbah u Myntri Rangbah ïa ka Capacity Building Centre ka PCI kular ban ïarap ïa ka bynta ba lai

Shillong, Naitung 4 : U Myntri Rangbah ka Jylla u Conrad K Sangma, ha ka Sngi Palei, ula plie ïa ka Centre for Capacity Building and Empowerment jong ka Presbyterian Church of India, Phase-I bad Phase-II jong ka project ha ka jingïadonlang u Symbud Myntri Rangbah u Bah Prestone Tynsong.
Haba ai jingkren ha ka jingïalang, u Myntri Rangbah ula pynshai ïa ka jingthmu kaba kham jylliew ha lyndet kane ka kam, haba pynpaw ba kam dei satia tang u mawmer ha ka jingtei hynrei ka rynsan ban pynkylla ïa ka jingim bad pynkup bor ïa ki samla.
Haba kren ïa ki nongrim ba btin lynti ïa u kaba long “La kha ban shakri” ula pynpaw ba ka synshar khadar bad ki jaka trei kam ba kynja mynsiem ki don ïa kajuh ka mishon, ban shakri ïa ki briew da ka jingaiti lut, ka jingsngewrit bad ka jingkut jingmut.
Halor ki jingsngewkhia kiba tawiar sawdong ka FCRA Amendment Bill, ula kren halor ki jingeh kumba pynpaw da ki Balang bad ki seng Niam kaba lah ban ktah ïa ki kam shakri para briew.
“Katba ka lynti ïaid jong ngi ka lah ban ïapher, ka thong ka dei kajuh, ban shakri ïa ki briew jong ngi” ula ong, haba ïai ban iïa ka jingkongsan ka jingïalong kawei ha ka ban pynbeit ïa kine ki jingeh kiba kyllaiñ kum ka FCRA Amendment. Ula khot ïa ki nongshong shnong bad ki nongïalam niam ba kin duwai bad ïatrei ryngkat ryngkat ha ka ban pynthikna ba ki jaka treikam kiba shakri ïa ka imlang sahlang kin nang bteng ban treikam kham bha khlem ki jingshah pynthut.
Haba kren halor ki jingnoh synniang jong ki Balang, u Myntri Rangbah ula ïaroh ïa ka bynta ka bym pat ju don ba leh mano mano ruh, kaba la leh da ka Presbyterian Church ha ka pule dangle, ka koit ka khiah bad ka roi ka par ki imlang salang, wat hashuwa ka jingmih jong ki rukom synshar da ki Sorkar ba pura.
Haba pynskhem biang ïa ka jingkut jingmut ka Sorkar, ula kular ïa ka jingkyrshan na ka bynta ka bynta ba lai ne Phase-III ban wan jong ka project bad ban buh ïa ka thong ban pynroi ïa ka centre kum ka hub of excellence kaba saiñdur ïa ki nongshong shnong kiba don ka jingkitkhlieh, kiba lah ban leh ïa kano kano ka kam bad kiba sngewtynnad ban shakri.
“Ka long ka burom ban ym sngewthait ban leh ïa kaei kaba ngi la duwai shisien ka por,” u la kynthoh, da kaba pynshlur ïa baroh ban ïohi ïa ka jingshakri ym kum ka jingkit, hynrei kum ka jingkyrkhu.