Shillong, Naitung 4 : Ka Jaintia National Council (JNC) mynta ka Sngi Saitjain ym tang ba ka pynrem jur ïa ka jingshah pyniap u Kyrshan Lamurong ha East Jaintia Hills hynrei ka dawa jur ïa ki pulit ba kin tohkit bniah halor kane ka jingjia khlem kano kano ka jingleh shilliang khmat.
Ka la ong ba kane ka jingiap une u rangbah ym dei tang ba ka dei ka kam leh runar hynrei ka buh ia ka jingim jong ki para briew ha ka jingma kaba khraw.
“ Ka jingduh noh ïa ka jingim ha kum kato ka jingleh runar ka la wanrah ka jingsngewsih kaba kthang bad pynbitar ruh ha ka juh ka por ïa ki paidbah. Ha kum kane ka por ka JNC ka don ha syndah jong ka long ïing kaba la mad ïa kane ka jingjia ba sngewsih bad ka phah ruh ïa ka jingsngewlem sha baroh kiba haïing hasem” ong ka Council.
Ka JNC ka la ong ba kan ïai bud dien ïa kane ka jingtohkit bad ka kwah ruh ban ïoh jingtip kaba shai na ki bor pulit na ka por sha ka por tad haduh ba ka hok bad jingshisha kin paw.
“ Ngi dawa ba ki pulit kin pynsted ïa ka jingtohkit bad kan long ka jingtohkit kaba shai bad kaba khlem don kano kano ka jingshah liang bad ban pynthikna ba baroh kito kiba donkti ha kane ka kam runar kin ngat ha ki kti jong ka aiñ” ong ka seng.
Ka Seng ka la kynnoh ruh ba kane ka jingïoh leh ki runar ïa kane ka kam pyniap briew ka dei ka jingbym shim khia ban peitngor da ki bor shnong. Namar ka seng ka ong ba na ka por sha ka bor ka la ïai kyntu ïa ka Dorbar Shnong, ïa ki Rangbah Shnong, ki Bor synshar shnong ban peitngor bha haba wan rung ki riew phylla ne ki riew thymmai shapoh ka shnong ka thaw bad ban pynthikna ruh ba ym dei ban don kiba sah ne trei hapoh ka shnong khlem da pyntip ne ïoh jingbit na ka Dorbar Shnong. ïa kane la leh ban don ka jingshngaiñ bad la dei ban shim khia bha ïa kane ka kam.
Kane ka jingshah pyniap jong u Kyrshan ka buh ïa ka jingim jong kiwei ki trai shnong ruh ha ka jingma kaba khraw namar ki briew ki bym lah ban ithuh ki ïoh ban sah ban ïaid ban ïeng katba mon hapoh ki shnong ki thaw. Wat hadien ba la ïai kyntu ban peitngor ruh ym shym la don ba shim khia ïa ka kam.
Kumta halor kane ka JNC ka pynbna ba baroh ki unit , ki Circle bad ki Zone jongka kin shim ka jingkit khlieh ban pynthikna ïa ki briew kiba shong ba sah ha baroh kawei ka ri lum Jaintia bad ban phah rejister ruh ïa baroh ki bar jylla kiba sah ha ka thaiñ. Kane ka jingleh kan ïarap ban pynthikna ïa ki briew kiba wan rung bad trei ha katei ka thaiñ bad lada jia kano kano ka jingjia ruh kan kham suk ban wad bad thwet ïa ki.
Ka kyntu ba ki bor synshar shnong bad ki Dorbar Shnong ruh ki dei ban ïatrei lang halor kane ka kam.
“ Ngin ym shong kli kti haba ki bor synshar shnong bad ki dorbar shnong kim shim khia ïa ka kam ban ïada ïa ki mynsiem briew. Kane ka dei ka rai ba la shim da ka CEC jongka JNC bad kan sdang ruh ban treikam nangne shakhmat.
