Shillong, Naitung 4: Ki nongmihkhmat jong ki kynhun khaïi na Bangladesh bad India ki la pynlong ïa ka jingïalang ha Bholaganj LC Ghat No. 10 ha ka 3 tarik u Naitung 2026 ha kaba la ïakren halor ki lad ban pynkhlaiñ ïa ka kam khaiï lyngba ka Majai Land Customs Station (LCS) bad ban pynbun ruh ïa ki mar kiba lah ban shalan bad wanrah hapdeng ki ar ri.
Ha ka jingïalang la wan iashim bynta da ki dkhot jong ka Bholagonj Chonapathar Amdanekarak Group, Bholagonj, Companigonj, Sylhet na Bangladesh bad ka United New Majai Exporters’ & Importers’ Association na Meghalaya, India.
Na liang ka Bangladesh, la ïalam da u President, Md Shahab Uddin, u Vice President, Bosher Ahamed bad u General Secretary, u Md Najrul Islam ryngkat bad kiwei pat ki nongkitkam.
Katba na liang ka India, la mihkhmat da u President, u Bah Challenge Rajee, u Vice President, U Bah John Paul Khongwir, u Treasurer, u Bah Oristar Syiemtwa bad ki Executive Member ba kynthup ïa u Bah John Kenedy Basaiawmoit, u Bah Hamarbabiang Khongsni bad u Bah Balajied Iawbor.
Ha ka jingïalang, baroh arliang ki la ïakren bniah halor ki sienjam ban pynkhlaiñ ïa ka jingïadei ha ka kam khaii bad ka jingïatreilang lyngba ka Majai Land Customs Station bad ki la ban jur ruh halor ka jingdonkam ban pynsuk ïa ka jingïaid jong ki mar bad ban pynjan ïa ka jingïatreilang hapdeng ki nongkhaïi jong baroh ar ri.
Watla u mawshun u dang long u mar ba kongsan tam ba la ju shalan lyngba kane ka lynti, hynrei ki nongmihkhmat na baroh arliang ki la pynpaw ïa ka jingkwah ban pynheh ïa ka jingkhaïi da kaba kynthup sa ïa kiwei pat ki mar.
Ha ka jingïakren, la tyrwa ban sdang shalan bad wanrah ruh ïa u dewïong, ki mar rep, ki soh bad kiwei de ki mar bad la ong ba kane kan plie lad thymmai ïa ki kam khaii, kan thaw kam thaw jam bad kan kyntiew ïa ka ïoh ka kot jong ki thaiñ khappud ha baroh ar ri.
Ha kaba kut, ki nongmihkhmat jong baroh arliang ki la pynskhem biang ïa ka jingangnud ban pynkhlaiñ ïa ka jingïadei ha ka kam khaii lyngba ka Majai Land Customs Station bad pynpaw ruh ïa ka jingkyrmen ba ka jingkhaïi kaba kham heh kan wanrah jingmyntoi ym tang ïa ki nongkhaïi hynrei ïa ki shnong khappud bad ïa ka ïoh ka kot jong baroh ar tylli ki ri.
