FIFA World Cup 2026 : Pynkhihjar u Ronaldo bad u Ramos ban pynrung Round-16 ïa ka Portugal

Toronto, Naitung 03: U Goncalo Ramos u la thep da ka khlieh ha ki minit pynjlan ba khatduh katba ka Portugal ka la pynliem noh ïa ka Croatia da 2-1 kol ha ka jingïakhun kaba itynnad bha kaba kynthup ruh ïa ka kol jong ka Croatia kaba la shah kyntait namar ka offside tang shuwa ban kut ka por ha ka Round-32 jong ka FIFA World Cup 2026 hynne ka step sngi Thohdieng.
Kane ka jingïalehkai ka pynïakynduh biang ïa arngut ki rangïalehkai ba pawnam jong ka Real Madrid kiba la palat 40 snem ka rta, u Cristiano Ronaldo ka Portugal, ha ka World Cup kaba hynriew jong u, bad u Luka Modric na Croatia, uba shim bynta ha ka sien kaba san.
U Ronaldo u la noh synñiang da kaba pynïakhaid ha ka minit kaba 68 na ka penalty ban thep ïa ka kol kaba nyngkong eh jong u ha ka jingïalehkai knock out jong ka FIFA World Cup shuwa ba un shah bujli noh ha ka minit kaba 81. Nangta u Ramos u la thep ïa ka namjop na ka bynta ka Portugal ban pynskhem ïa ka jaka ha ka Round-16.
Ka jingïalehkai ka la kut noh ha ka jingïakynad ha kaba ka Croatia ka la pyrkhat ba ka la pynïakhaid mar 2-2 kol ha ka khyllipmat kaba khatduh, hynrei u Mario Pasalic u la shah rai offside hadien ba la bishar bñiah da ka VAR kaba la kyntait shi syndon ïa ka kol. Kane ka la pynbitar ïa ki nongkyrshan jong ka Croatia, kiba la bret ïa ki bilor ha madan bad pynsawa da ka sur pyrshah.
Ka Croatia ka la ïoh ban pynkhihjar nyngkong ha ka minit kaba 53 hadien ba u Ivan Perisic u la thep ïa ka kol na ka bol pashat jong u Josip Sanisic.
U Ronaldo, uba la shah kynthoh jur ha ki nongkyrshan jong ka Croatia man ka por ba u ktah ïa ka bol, u la ïoh ïa ka kabu na ka penalty hadien ba u Nikola Vlasic u la shah pynshitom namar ka handball hapoh phyllaw kol (box). U ne u khlur ïalehkai jong ka Portugal u la shut napdeng katba u nongap kol u la kynriah sha liang kamon.
Da kane ka namjop ka Portugal ka la jam shakhmat bad kan ïakhun pyrshah ïa ka Spain ha ka sngi Ba-ar (07 tarik Naitung) ha ka Round-16.
Kaba kham sngewtynnad ka long ba u Cristiano Ronaldo ryngkat ka kynhun, ki la kynmaw bad leh burom ïa la u paralok barim u Diogo Jota, kaba dei ruh ka sngi dap shisnem thik naduh ba u Jota bad u para jong u-u Andre Silva ki la khlad noh ha ka jingjia ïatyngkhuh kali ha Spain.
U Ronaldo, uba la thep ïa ka kol ba nyngkong jong ka Portugal ha kane ka jingïakhun lyngba ka penalty, u la phong ïa ka sopti Portugal kaba don ïa u nombar. 21 jong u Jota hadien ba la kut ka jingïalehkai bad u la kdew sha bneng ryngkat bad ki ummat kiba tuid ha ki khmat jong u.
“Ngi la tip ïa ka shuwa ka jingïalehkai, ka long shisha ka khyllipmat kaba kyrpang,” la ong u Ronaldo. “Ngi kren mynta ka sngi, ka kynhun jong ngi, shaphang ka jingjia kaba ïadei bad ka jingim, ka long kaba ym lah ban ngeit. Nga la sngew lyngngoh namar ka jinglong jingman mynta ka sngi ka mut shibun eh ïa ngi, ym tang namar ba ngi la jop ïa ka jingïakhun hynrei ka rukom.”
Shuh shuh u Ronaldo u la bynrap, “Ngi tip ba u don ryngkat bad ngi bad ka la long kaba kit jingmut shisha ban jop mynta ka sngi ban ainam bad leh burom ïa u ha ka rukom kaba bha tam.”
U Jota, uba la ïalehkai 49 sien na ka bynta ka Portugal, bad thep 14 kol, u la khlad noh ha ka jingjia ba sngewsih ha u snem ba la dep, ha ka 03 tarik Naitung, hadien ba ma u bad u para jong u, u Silva, uba dang 25 snem, ki la ngat ha ka jingjia aksiden kali kaba la shim noh ïa ka mynsiem jong ki.
Shibnai hadien ka jingkhlad noh jong u Jota, ka Portugal ka la rai ban pynkup burom ïa u da kaba aiti noh ïa ka sopti No. 21 jong ka kynhun ïalehkai ka Ri sha u paralok ba jan jong u, u Ruben Neves.
U Jota u dei shi bynta jong ka kynhun kaba la jop ïa ka UEFA Nations League ha u snem 2019 bad sa shisien pat ha u snem 2025, ha ka por ba ka Portugal ka la jop ïa ka Spain ha ka phainal. Tang katto katne taïew shuwa ka jingiap u la lehkmen ïa ka jingjop ryngkat bad ki paralok jong u. U para jong u, u Silva, uba dei ruh u nongïalehkai phutbol, u mih madan ïa ka klob ba ïakhun Second Division jong ka Portugal, ka Penafiel.