Lada ka sorkar ka pynbiej da ka thungkam ha Food Court Umling shaei jah ki samla ba la trei ha Facilitation Centre?

Nongpoh, Naitung 02: Haka jingïakynduh bad ki bor district ka Ri-Bhoi ban ïakren halor ka Facilitation Centre kaba don ha Umling ba ka sorkar kala thmu ban tei da ka jaka bam ne Food Court, naka liang u Bah Ferdinald Kharkamni President ka KSU North Khasi Hills District u la ong ba ki bor district ki pynthame da ka iohkam iohjam ki samla.
Haba kren sha ki lad pathai khubor hadien ka jingïakynduh u Bah Ferdinald u la ong ba lada wan kano kano ka project ka iohkam iohjam kan wan beit, hynrei katno ki samla ka district ki iohkam haki dhaba, haki petrol pump bad kumta ter ter, namar ka jingïakren ka long beit shaphang ka iohkam iohjam, hynrei ka jingkylli ka seng ka long ba shaei ki jah ki 32 ngut ki samla kiba la trei kum ki Data Entry Operator haka por bala plie ïaka facilitation Centre ha Umling bad kiwei kiwei ki samla kiba la iohkam ha katei ka jaka kumba la pynbna da ka sorkar.
Shuh shuh u la ong ngi kwah ïaka Facilitation Centre ban long kum ka jaka talasi ym tang ïaki briew hynrei wat ki kam sniew khamtam ki tiar sniew ba ki wanrah sha ka jylla kum u drok, bad lada ka sorkar ka thmu ban pyntreikam hok ïaka Meghalaya Residents Safety and Security Act, 2016, pyndam noh ïaka tender ban tei jaka bam bad tei da ka Facilitation Centre naka bynta ka bit ka biang ka jylla.