Shillong, Naitung 02: Ka jingpyntreikam ïa ka Special Intensive Revision (SIR) 2026 jong ka Electoral Roll ka la ïaid shaid shaid ha East Khasi Hills, ha kaba ki Booth Level Officers (BLOs) ki la sdang naduh ka 30 tarik Jylliew ban leit rung ha man la ki iing ha baroh 898 tylli ki polling kiba hap hapoh ki 15 tylli ki Assembly Constituency jong ka distrik ban sam ïa ki Enumeration Form.
Katkum ka kyrwoh na u District Election Officer (DEO), haduh ka 02 tarik Naitung, kiba dei tang ki lai sngi naduh ba sdang ka SIR, la sam haduh 63,731 tylli ki Enumeration Form, katba 1,401 tylli ki form la dep ruh ban digitize.
U DEO u la ong ba ka jingthmu ka long ban pyndep ïa ka jingsam bad ka jinglum biang ïa baroh ki form ba la pyndap hapoh ka 29 tarik Naitung.
“Na baroh ki constituency, ka Pynursla ka la don bun tam ki form ba la sam haduh mynta da ki 7202 tylli, katba ka Mawlai da 5857tylli bad Mawryngkneng da ki 5712 tylli ki la don hapdeng ki constituency kiba la sam bun ki form,” ong ka kyrwoh na ka ophis u DEO.
Ha ka liang ka jingdigitize ïa ki form ba la ïoh lum, ka Mawphlang ka la wan hakhmat eh, bud sa ka Nongthymmai bad ka Mawlai.
Ki ophisar ki la ïathuh ba ha ka jingleit rung man ka ïing la buddien bad peitngor bha ïa ka jingïaid jong ka kam.
Shuh shuh, la ïathuh ba la plie ruh ïa ka District SIR Helpline ban jubab ïa ki jingkylli bad jingïarap ïa ki paidbah kiba donkam jingïoh jingtip shaphang kane ka kam.
“Haduh ka 02 tarik Naitung 2026, ka District SIR Helpline ka la ïoh pdiang 9 tylli ki jingkylli na ki paidbah bad baroh la lah ban pynbeit,” la ong ka kyrwoh.
