Sha u DC pyntip u Bah Arkijuh halor ka jingjulor ka surok ha jingkieng Ladrymbai

Khliehriat, Naitung 02: U bah Arkijuh Dkhar, uba na shnong Khliehriat West lyngba ka jingthoh u la pyntip sha u Deputy Commissioner ka East Jaiñtia Hills District halor ka jingjulor ka surok ha ki bynta ka jingkieng ha Ladrymbai bad ong ba ki la don bun ki thliew kiba heh hapdeng surok ha kane ka jingkieng bad ha kum kane ka por ba jur slap ki thliew ki dap da ka um bad buh jingeh ïa ki kali ban iaid.
U la ong ruh tang khyndiat bnai hadien ka jingmaramot ïa ka surok mynta ka surok ka la sniew biang khamtam ha ki bynta ha Ladrymbai, kane ka jingsniew ka surok ka wanrah ruh ka jingthut ha ka jingiaid ki kali, ka buh jingeh ïa kiba ñiah kali bad kito kiba ñiah ia ki ar shaka, ka jingsniew ka surok ka buh jingeh ruh ïa kiba leit ba wan jong ki paidbah ba kynthup naduh ki khynnah skul, ki kali kit nongpang kumjuh ruh kiwei kiwei ki kali ba kit jingkit kiba iaid lyngba na kane ka surok bah NH 6.
U bah Arkijuh u la pynpaw ruh ba ka dang don ka jingsahteng ïa ka jingpyntrei ïa ki nar kiba ker ha ka jingkieng Ladrymbai bad ka jingker ïa ki bynta ha jingkieng ka long kaba donkam bha ban lait na kano kano ka jingjia ba sngewsih khamtam ha kum kane ka por ba dum slap ha ka por mynmiet , u kyntu ïa u DC ba un sngewbha ban leit jurip hi dalade ïa kane ka bynta ba don ka jingkieng ha Ladrymbai.
“Ka surok NH-6 ka dei ka surok bah kaba donkam bha namar kane ka surok ka pyniasoh bad shibun kiwei pat ki jylla kiba don ha ka thaiñ shtei lam mihngi,ki paidbah ruh ki khmihlynti ba ka jingmaramot ïa ka surok kan long kaba paka bad kaba neh, ka long kaba eh ban pyrkhat ba kumno ka surok kaba dang shu dep maramot tang hapoh hynriew bnai ka la sniew bad julor” pynpaw u bah Arkijuh Dkhar.
Shuh shuh, u bah Arkijuh u kyntu ïa u Deputy Commissioner ban pynlong ïa ka jingjurip ïa ka bynta ka surok ha jingkieng Ladrymbai, ban iakren bad ka Highways Authority of India ban pyntrei bha ïa ka jingmaramot ïa ka surok kaba dap da ki thliew kiba dap um, ban pyntikna ruh ba ka jingker nar ha jingkieng ha Ladrymbai kan long kaba la trei dep, ban pyntikna ruh ba ka jingmaramot ïa ka surok kan long kaba paka kaba neh bad ka ban nym buh jingma ïa ki nongleit nongwan.