Mynjur ka Kynhun Myntri ban weng noh ïa ka kyndon 3(f) jong ka MPSC ban pynduh noh ka jingthung kam shipor

Shillong, Jylliew 30: Da ka jingthmu ban tehlakam ïa ka jingïai bteng ka jingthungkam shipor ne Adhoc, ka Kynhun Myntri ha ka sngi Baar kala ai jingmynjur ban pynkylla ïa ki kyndon jong ka Meghalaya Public Service Commission (Limitation of Functions) Regulations, 1972, da kaba pynduh pyndam noh ïa ka Kyndon 3(f) kaba plie lad ban thungkam shipor ïa ki nongtrei.
U Myntri Rangbah ka Jylla u Conrad K Sangma, hadien ba la dep lum ïa ka jingïalang jong ka Kynhun Myntri, ula ong ba ïa katei ka rai la shim ban pynlong ïa ka jingthungkam thungjam kaba khuid bad kaba ïaid katkum ka jingwan shakhmat.
“Ngi la mynjur ïa ka jingpynkylla ïa ka Meghalaya Public Service Commission (Limitation of Functions) Regulations, 1972, da kaba pynduh noh ïa ka Kyndon 3(f). Kane ka dei ka jingpynkylla kaba khraw ha ka kam sorkar da ka jingthmu ban pynlong ïa ka jingthungkam thungjam kaba khuid ba suba, ka ban long ryntih bad kaba pynshong nongrim katkum ka jingwan shakhmat eh” ula ong.
U Sangma ula ong, ba katei ka kyndon, ka dei tang na ka bynta katto katne eh ki jingjia, hynrei kala pynmih pat ïa ki kynrum kynram ha ka rukom treikam.
“Ka kyndon jong ka jingthungkam shipor hapoh jong ka 3(f), ha kaba nyngkong eh ka dei tang na ka bynta ki katto katne ki daw ki bym lah kiar, hynrei ha ki snem kiba la dep ka la lam pynban sha ka jingwanrah ïa ki kyrnum kynram bad kala pynjrong ïa ka jingthungkam shipor ïa ki nongtrei” ula ong.
Da ka jingtreikam mynta jong ki Recruitment Boards bad ka jinglah ban tip lypa ïa ka jinglait ki kam, kumta katei ka kyndon kam long shuh kaba donkam.
“Mynta da ka jingdon ïa ki Recruitment Board kiba kyrpang, ka jingpynbeit ryntih ïa ka rukom treikam ha ka jingthungkam bad ka jingïaid shakhmat ban tip lypa ïa ka jinglait kam da kaba ïoh lypa ïa ka por kaba bun, ka jingdonkam ïa ka Regulation 3(f) ka la nang hiar bha” ula ong.
U Myntri Rangbah ula pynshai ba ka jingdonkam kyrkieh ban thung nongtrei lah ban shimkhia da kaba thung kam da ka kontrak tad haduh ban da lah dep ban thungkam pura ha ki kam kiba lait.
“Da kaba ïaid shakhmat, kino kino ki jingthungkam kiba donkam hok kiba long tang shipor lah ban pyndep lyngba ka jingthungkam da ka kontrak tad haduh ban da lah pyndep ïa ka jingthungkam kaba pura”.
Ula ong, ba ka jingpynkylla kan pynskhem ïa ka jinglong khuid ka sorkar ha ka jingthungkam.
“Kane ka jingpynkylla kana pynkhlaiñ ïa ka rukom treikam ha ka jingthungkam thungjam bad pynthikna ba kan don ka jingpaka bad ka jingkhuid ha ka jingthungkam ïa ki nongtrei ki ban ai jingshakri ïa ki paidbah” la bynrap u Sangma.