Yn leit ïakynduh u Myntri Rangbah ïa ki Myntri Sorkar Pdeng ban ïakren pynkylla ïa ka MMDR Act

Shillong, Jylliew 30 : U Myntri Rangbah ka jylla u Conrad K Sangma ha ka Sngi Ba Ar u la ïathuh ba ma u lem bad ka Kynhun Myntri, ki Ophisar kin leit ïa kynduh ïa ki Myntri ka Sorkar Pdeng ban ïakren na ka bynta ban wanrah ka jingpynkylla ha ka MMDR Act lane ban thaw da ki aiñ kiba thymmai ban lah tih dewiong kat kum ka juk science kaba ki nongtih dewiong kiba rit ruh kin lah ban tih namar kane kaba mynta kaba donkam haduh 100 hecter ka jaka kam ïahap satia ïa ki nong Meghalaya namar ym tang ba donkam bun ka jaka hynrei hap ban bei pisa bun ruh na ka bynta ban tih dewiong.
U Myntri Rangbah u la ïathuh ba un ïakren ïa kane ka kam bad u Myntri Kam Pohïing ka ri bad kumjuh ruh bad u Myntri Kam Tih Mar Pohkhyndew. “ Ngan leit ïa kren bad u Myntri Kam Pohïing bad Myntri Kam Tih Mar Pohkhyndew ka ri na ka bynta kane ka kam tih dewiong hangne ha jylla Meghalaya” ong u Myntri Rangbah.
Wat la ïa ka jingkhang tih dewiong la weng noh ha ka jylla bad la wanrah da kane ka rukom tih dewiong kat kum ka juk saian kaba la mynjur da ka Coal India bad ka Union Mining Ministry hynrei ka jingshisha pat ka ïapher na ka bynta ki nongtih par dewiong hapoh ka jylla.
Kane ka rukom tih dewiong kaba donkam da 100 hectre ka long kaba ym lah satia ban pyntreikam ha kane ka jylla namar ka eh ïa ki nongtih dewiong ban bei tyngka bun ban ïoh tih dewiong, ong u Myntri Rangbah.
U la ong ba kiba bun ki nongtih dewiong kim lah kot bor satia kat kum ki kyndon ba la pyntreikam.
“ Namar na ka bynta kiba bun ki nongtih dewiong ka jaka ka la heh palat ka jingpynlut ruh ka la bun kumta ka la buh ïa ki ha ka jingeh kaba khraw kumta na ka liang ka sorkar ka sngewkhia ïa kane ka kam na ka bynta ki nongtih dewiong kiba rit hapoh ka jylla kumta ngin leit ïakren ban pynkylla ïa ka aiñ khnang ba kiba rit kin lah ban tih dewiong” ong u Myntri Rangbah.
“ Ngi la pyrkhat sani ïa kane ka kam naduh mynshwa bad ngi la thaw ki lad ki lynti kumno ban tih dewiong da ki kor ki bor ka juk ba mynta bad na ka liang ki nongtih dewiong ki la wanrah da ki buit tih dewiong kiba thymmai kiba i biang bha hapoh ka jylla. Ngin leit rah ïa kane ka jingai buit jongki sha ka sorkar India bad ngi kyrmen ba ngin ïoh ka jingmynjur na ka sorkar pdeng ruh” ong u Myntri Rangbah.
“ Tangba kam long kaba suk kat kum ba ngi kwah namar ki don ki kyndon hapoh ka ri baroh kawei ruh. Kaba donkam ka long lah ban pynkylla ïa ka MMDR Act ne wanrah da kiwei ki kyndon kiba lah ban pyntreikam hapoh ka jylla”. ong u Myntri Rangbah da kaba ban biang ba un shim khia bad ïai bud dien bad ka sorkar pdeng halor kane ka kam.
Haba phai sha ka jingdonkam ba kyrkieh jong ki paidbah halor kane ka kam ka sorkar ruh ka la rai ban shim khia bha bad ïai bud dien beit bad ka sorkar pdeng.
Hooid ka jingtih dewiong kat kum ka juk saian da kaba tih ïa u lum baroh uwei ka la sdang hapoh ka jylla bad la sei ruh ia u dewiong hynrei hap ban pyrkhat ruh pat na ka bynta ki nongtih dewiong kiba rit ban ïa myntoi lang baroh, pynkut u myntri rangbah.