Shillong, Jylliew 30: Ka jylla Meghalaya ka la ioh ïa ka mang tyngka kaba long T.1100 klur na ka sorkar kmie na ka bynta ki khyndai bnai ba nyngkong jong ka jingpyntreikam ïa ka ain thymmai ka Viksit Bharat-Guarantee for Rozgar and Ajeevika Mission (Gramin) Act, 2025, ong u Myntri Rangbah ka Jylla Conrad K Sangma ha ka sngi Ba-ar hadien ba ka kynhun myntri ka la pdiang ïa kane ka Act.
Kane ka Act kaba thymmai, kaba bujli ïa ka MGNREG Act bad kaba treikam naduh ka 1 tarik u Naitung, kan treikam haduh ka 31 tarik u Lber, 2027 na ka bynta ka bynta kaba mynta.U Sangma u la ong ba katei ka pisa kaba T.1100 klur ka dei ka normative allotment kaba la mynjur da ka sorkar India na ka bynta ka jylla Meghalaya na ka bynta kane ka por.
“Na ka bynta kane ka por kaba khyndai bnai naduh u bnai Naitung haduh ka 31 tarik u Lber, ka normative allotment ba la ai sha ka Meghalaya ka long T.1100 klur”, la ong u Myntri Rangbah ka Jylla da kaba bynrap ba ïa ka quarter ba nyngkong naduh u bnai Iaiong haduh u bnai Jylliew la pyntreikam katkum ki kyndon ba rim jong ka MGNREGS.
“Ka jingpyntreikam ïa kane ka Act thymmai kan sdang lashai ka sngi.Kumta naduh ka 1tarik Naitung haduh ka 31tarik Lber, 2027 ïa kane yn pyntreikam da ka Meghalaya… hynrei naduh lashai ka sngi ka jingbthah ba thymmai bad ka Act ba thymmai.”
U Sangma u la ban jur ba katba ïa ka T.1100 klur yn ïasam lang ba 90:10 hapdeng ka sorkar kmie bad ka sorkar Jylla, kano kano ka jingpynlut palat ïa ka pisa ba la mang ka dei ban bei lut da ka Meghalaya. “Kaei kaba kongsan ban tip ha kane ka skhim kyrpang ka long ba ka T. 1100 ka dei ka jingmang pisa kaba la buh bad lada ka jingmang kaba la buh ka iaid palat ïa ka jingmang kaba la shim ba ngi pynkut noh da kaba pynlut T.1200 klur ha ka jaka jong ka T.1100 klur, ka T.1100 klur kaba la ai sha ka 90 yn siew da ka sorkar kmie bad 10 percent da ka Jylla hynrei haba ïadei bad ka jinglut palat ïa ka jingai kaba la buh, ki jylla kin hap ban kit lut ïa ka pisa ba la pynlut tam kaba pynlut”, u la ong.
Ka VB-G Ram G Act ka pynbha ïa ka MGNREG Act kaba kham mynshuwa da kaba pynkiew ïa ka jingtrei kaba rit tam kaba la pynthikna na ka 100 sha ka 125 bad pynheh ïa ka thup jong ki kam ba la shah naduh kumba 240-250 sha palat 320.
“Kumba phi tip kane ka dei ka Act kaba thymmai ha ka jaka jong ka MGNREG Act bad ïa kane la pynbha mynta bad ki kyndon kum na ka bynta ka sngi trei kaba duna tam kaba 100 ban pynkiew sha ka 125”, la ong u Sangma.
Ki projek kum ki surok bad ki jingpyniasoh, ki bym shym la buh hakhmat eh mynshuwa, mynta la buh hakhmat eh.Lah ruh ban shna ïa ki Anganwadi centre bad ki ïing skul, kiba mynshwa ym shym la shah hapoh ka MGNREGS.
