Sngew phylla ka longkmie ïa ka jingkren CS da u phlang kynbat yn pynbeit ïa ka jingtih dewïong

Jowai, Jylliew 23: Kawei na ki longkmie na ka thaiñ East Jaiñtia kaba dei ka Secretary jong ka Farmer Union ka kong Jhanika Siangshai ka la pynpaw ka jingsngew phylla halor ka jingong u Chief Secretary ka jylla ha ka jingïalang jong ka Workshop halor ka Medicinal and Aromatic Plants (MAPs) ha Shillong ‘dei ban thung noh da ki Phlang Kynbat ha ki jaka ba shah ktah na ka jingtih dewïong ban pynbeit ïa kane ka jingeh’.
Ha ka jingkren jong ka hynnin ka sngi ha ka jingïalang ka JCOMSWA ka la ong kumno utei u Chief Secretary jong ka sorkar ula jubab ïa kane ka jingdawa ka seng ban pyllait ïa ka jingtih dewïong da kaba pynsngew ïa kitei ki kyntien ha ka Workshop, ha ka jingshisha u dei ban kren beit ha ka jingïalang ba la khot pynlong ha Secretariat bad ki nongïalam ka JCOMSWA.
Halor kane ka la buh jingkylli hato ki paidbah ka East Jaiñtia ki hun mo ïa kane ka jingong u Chief Secretary, wat haba ïa ki mar rep kiba la pynmih na kane ka thaiñ naduh u shynrai, u sying, u phan kiba hiar dor shaba palat bad ka jingthied ïa ki symbai ka la long ha ka dor kaba rem khlem ïoh ïa ka subsidy.
Ka la ai nuksa ïa u shynrai u long uwei na ki dawai bah ba pyndonkam ha ki pharmacy ha kylleng ka Ri ka pyrthei wat hapdeng ka jingeh kaba buh ban pynïaid ïew ïa u, hynrei kane ka jingong u CS kam lah satia ban pdiang da kiba bun balang khamtam ki paidbah na East Jaiñtia kiba ju im naduh ki por mynshwa na kam dewïong.
Halor kane ka jingïakhih jong ki, ki don pat kiba ong ka long kaba pyrshah, hynrei ka la pynshai lem ka long kaba jai jia da ka jingïasyllok lang bad kane ka jingshong shah thngan la leh naduh ki por jong u Mahatma Gandhi.
Shuh shuh ka la pynpaw ka jingsngew phylla halor kita ki skim ba wanrah ka sorkar ban thuh noh da ki dawai kynbat ha ki jaka tih dewïong bad kam long satia kaba lah ban pdiang kum ki paidbah kiba ju im ja na ka kam dewïong.
Ha ka juh ka por ka pynpaw kum ka seng JCOMSWA ki khlem pyrshah ïa kino kino ki kynhun kiba wan ban ïasnohkti lang, namar khlem u dewïong lah ban ïakynduh shibun ki jingeh wat ka sorkar kala ïoh nong shibun eh na u dewïong (Revenue).
Ha kaba ïadei bad kane ka jingïakhih kala kren shai kum ki nongïalam sorkar kim dei ban kylla ktien namar ka bor ka shong ha u paidbah bad ka seng kan tur shakhmat da ka sur jong u paidbah bad ka jingïaid lynti mynta ka dang jngai da ka jingshañiah ha u Blei hapoh ka jingïalam u ma Marshall S.B Biam ïa ka kynhun kum u Moses haduh ban ïoh ïa ka jingjop.