“Ym don ba lah ban thied ïa nga wat ha ka sngi ka jingïap” kyntait ban leit ïakren ha ïing u CM

Jowai, Jylliew 21: U President ka Jaiñtia Coal Owners, Miners, Suppliers & Workers Association, (JCOMSWA) u ma Marshall S.B Biam haba ai jingkren mynta ka sngi 22 tarik ban pynsangeh shwa ïa ka jingshah thngan kaba la sdang naduh ka 1 tarik u Jylliew 2026 ha Madan bol jong ka Ladrymbai Dongwah, East Jaiñtia Hills District.
“Mynta ka sngi kaba dei ka sngi shuti ula kyntait ban leit sha ka jingshah khot ïakren bad u Myntri Rangbah ka jylla, da kaba u ong ‘ym don ba lah ban thied ïa nga wat haka sngi ka jingïap’ bad ban thied ïa nga dei tang ka nongrim ban plie ïa u Dewïong. Shuh shuh u ong um kwah ban ïakren ïa kane ka jingeh ha ïing u Conrad Sangma tang ban ïoh ïa dihsha sngewbha, hynrei nga kwah ban ïakren ha ophis Secretariat”, ong bah Marshall.
Hashwa ban pynbna ïa kane ka jingsangeh shah thngan kala don ka jingïalang ha katei ka madan da ka jingwan ïashim bynta lang jong ki paidbah nongkyrshan ban sngap ïa ka jingthmu ka JCOMSWA ban dawa na ka sorkar ban pylliat noh ïa ka jingkhang tih dewïong hapoh ka jylla kumba long ha ki por mynshwa.
U ma Marshall S.B Biam haba ai jingkren ula ai khublei ïa baroh kiba la ïasnohkti lang bad u ha ka jingshah thngan kaba 16 sngi haduh ba la pynkit noh ïa u sha Hospital ban ïoh jingsumar bad ula pynpaw ka jingsngewnguh ba u Blei ula ai bor ha u ïa ka met kaba koit ba khiah haduh mynta ka sngi.
Ula kren shai sha ka sorkar, ba ka (JCOMSWA) kan nym pyndem ïa kane ka jingdawa, ula khot ïa baroh ban wan shakhmat, da kaba ong wat long kiba ksan rympei rem dorbar, ‘kane ka long tang ka jingsdang bad ka jingïakhih ka dang jur shakhmat.
Ula ïa khublei ïa ka kynhun jong ka (JCOMSWA) kiba la leit da ka jingshlur sha Secretariat haka 17 tarik ban ïakren bad ka sorkar halor ki mat jingdawa ban shah tih dewïong naduh ki rit ki ria, kumjuh ka rukom pynkhreh ïa ka Drafting Mining bad ban pynsangeh ïa u dewïong ba wan nabar.
Ula pyntip ruh ha ka jingïakhih jong ki ha kane ka kynti, naka liang ka sorkar kala pynbna syndon ‘ka don ka skim ïa kiba shah ktah na ka jingkhang tih dewïong naduh ka 2014’, kumta ula khot ïa baroh ban ïaleit lang sha ka ophis DC ban khynra ïa ki kot ki sla.
Utei u President ula pynshai haduh mynta ka JHADC kam pat lah ban thaw ïa kano kano ka kyndon aiñ kaba ïadei bad u dewïong, watla ka don haka ka bor bala pynkhamti ban long trai ïa ka khyndew ka shyiap da ka Riti synshar ka Ri.
“Lada ka District Council kam lah ban thaw aiñ, ngi leit tur sha ka ophis treikam jong ka bad dawa ïa baroh ki 29 ngut ki MDC ban hiar shuki noh namar kam donkam ïa ki tang ban ïoh tulop khlem lah ban thaw aiñ, ula kyntu ïa ka District Council ba kan kylla ba mut namar ka por ka dang don.
Ha ka juh ka por ula ong ‘ngam kwah ban ïakynduh bad ki briew kiba nabar lyngba u Chief Justice bala shongthaid kumba la dep pynbeit da ka sorkar halor kane ka kam, namar ki paidbah ruh kim pdiang da lei lei ïa kane’.
Ha kaba ïadei bad ka jingkren u Symbud Myntri rangbah bah Prestone Tynsong haka 18 tarik u ma Marshall ula kynnoh namar bala syllen palat ka khlieh khlem shñiuh ka jingkren jong u ka long kaba ym don jabeiñ, da kaba u ong ïa ki kyntien ïa u dewïong ngim lah ban pynkylla ïa ka aiñ bad ym lah ban shu thoh ha ka kot sada ïa ka aiñ, halor kane ula pynrem ha ei pat ngin thoh ha ka sla, ka dieng ne ha u maw buh jingkylli u ma Marshall, da kaba kynthoh ruh baroh kine ki jingkren klumar ki dei na ka daw ka jingsynshar arsap bad ka jingleh donbor.
Ula maham baroh ki kynhun seng saiñ hima sima kin dei shuh ban shim issue ïa ka kam dewïong haka por ba ïalap Election, ‘lada don kiba wan sha ki ïing ki sem rah syndon da u dewïong ba kin ïoh ïakren khnang ba kin sngewthuh ïa ka jingshah ktah ki paidbah’.
Ula kynthoh halor ka jinglong u MLA ka Khliehriat uba la khot ïa u ban leit dihsha sha iïng u Conrad, ula pynreh ruh halor ka jingong jong u ‘kum u Minister um lah ban kren ïa kane ka jingeh hapoh ka ïing dorbar. Ula phah ka khubor kumjuh sha baroh ar ngut ki MLA ka East Jaiñtia ka por ka dang biang ban kylla kaba mut naka bynta ban plie dewïong, lada ym lah ban pynbeit ïa kane ka lah ban buh jingeh ïa ki haka Election 2028.
Kum ka kynhun (JCOMSWA) “Ngin ïakhih beit khlem jingsheptieng namar ym don Jail kaba lah ban set patok ïa ki paidbah kaba kot haduh 5 hajatr ne 10 hajar ngut, kaba donkam mynta ban don ka jingïatylli bad ‘ka jingïakhih ba tyngeh ka dang jur nangne shakhmat’.
Ngin ïamih madan noh nangne bad kaei kaba kor ‘ka sorkar ne u paidbah’, wat tieng ïa ki pulit namar kam don ka aiñ ban shoh bad bom ïa ki paidbah ha ki jingïakhih ban ïoh ïaka hok, wat ïa u SP ka East Jaiñtia Hills la shah pynkynriah noh ha kine ki sngi namar jingshah ktah na ka jingïakhih ki paidbah, ong shuh shuh utei u President.
Mynta ka sngi la don ka jingleh burom da kaba ai syntiew ïa ki saw ngut ki riew rangbah kiba la ïashim bynta ban shong shah thngan kiba kynthup ïa u President ka JCOMSWA ma Marshall S.B Biam, u ma Jesper Thoo, u ma Mewanpoi Biam bad u Chairman ka JCOMSWA ma Shemphang Langstang.
Ka jingïakhih ba tyngeh ka dang jur nangne shakhmat khlem ka pynbna paidbah shwa, hynrei ngin leh da kaba sop sop khlem ka jingtip ka sorkar, la 8 snem ngi la shah pynbeit hynrei mynta ngi la stad bad ngi la rai kut ban ïada ïa ka jaitbynriew na ka bynta ka lawei jong ki khun ki kti, pynkut u ma Marshall S.B Biam.