Jowai, Lber 23: Ka Jaiñtia Women Awakening Movement (JWAM) lyngba ka kyrwoh bala phah daka President ka kong R. Shylla ka ai khublei bad kitbok kitrwiang ïa baroh ki khynnah bad ki samla kiba don hapoh ka Ri-Lum Jaiñtia bad haka jylla hi baroh kawei kiban ïakhun ïaka eksamin SSLC bad HSSLC ha une u snem 2022 kaban sa sdang lashai la shi sngi.
Naduh kine ki snem bala leit ka pule puthi hapoh ka jylla ka lahiar bha naka daw ka pakhang shnong ban ïakhun ïaka khlam pyrthei ka Covid-19 hynrei mynta u snem pat ka lad kala plie ïaka tnad pule puthi bad ki khynnah pule kiba la poi ha kane ka kyrdan ha kin pynlong ïa kane ka eksamin naka bynta ban kyntiew ïaka pule puthi hapoh ka jylla bad ka jait bynriew. Kumta ka seng ka kyntu ïaki khynnah samla kiban ïakhun ïa kane ka eksamin ba kin long kiba la khreh janai bha ban thoh khnang ba kin ïoh ïa u soh jong ka jing jop.
Kum ki khynnah skul kim dei ban shu buh thong ïalade tang kat ban pass, hynrei ban ïabeh ïaki kyrdan kiba kham sha khmat khnang ba kin kham suk haka pule puthi jong ki haki kyndan kiba kham sha khmat. Namarba ki skull bad ki College bapher bapher ki pdiang shwa ïaki khynnah kiba wan kham sha khmat haki result jong ki.
Kumba long mynta ka Mobile Phone kadei kawei naki daw bah daw san kaba pynthut ïaki khynnah ban khreh kot lada kim nang ban pyndonkam ïaka por. Kumta ka seng ka kyntu ïaki khynnah samla bakin long kiba nang ban pyndonkam hok ïaki Mobile Phone ki jong ki hakum kane ka por ba donkam bad wat ai ba kan long maw jynthut ïaka pule puthi jong ki.
Shuh shuh ka seng ka kyntu ba kim dei ban sngew sarong baki long kiba proh jabieng ne kiba stad, bad kim dei ban shañiah haka ta ka bok ka nusib hynrei dei tang ka jingtrei shitom bad ka jingminot keiñ kaba lah ban wanrah ïaka jingjop.
Aiba kane ka khubor bad kine ki kyntien kin long ki jingkyrkhu ïaphi ki khynnah pule kiban ïakhun ïa kine ki artylli ki eksamin!.
