La kyrkhu ïa u mawnongrim na ka ban tei thymmai ïa ka St. Dominic Savio Catholic Church, Garobadha

Shillong, Jylliew 22: Kan long ka mawmer kaba kongsan ha kaba ïadei bad ka jingtei kaba dang ïaid ban shna thymmai ïa ka Ïingmane jong ka St. Dominic Savio Catholic Church, Garobadha, ha la lah sngi U Blei, ha kaba la kyrkhu ïa ka jingbuh mawnongrim ha kaba la pynbud pat sa da ka Mass Bakhuid kaba nyngkong eh jong kane ka Parish.
Ïa ka jinglehniam kyrkhu ïa u mawnongrim la pynïaid da u Rev. Fr. Siby John, SDB, Parish Priest, ha ka jingiadonlang u Rev. Fr. Punit Kumar Lakra, SDB, Rector-cum-Principal, Rev. Fr. Benny Mushahary, SDB, Rev. Fr. Anmol Soreng, SDB, Sr. Cecilia, FMA, Superior ka Mazzarello Convent, kiwei pat ki Sister, ki dkhot ka Parish Council, ki nongmihkhmat na ki seng ïasyllok ki riewniam bapher bapher, ki samla hostel shynrang bad kynthei, bad kynthup ruh ïa ki dkhot jong ka parish babun.
Ha shwa ban kyrkhu, u Fr. Siby John u la khot sngewbha ïa ki riewngeit ban ïatylli lang ha ka jingduwai na ka bynta ban lah ban pyndep da ka jingjop ban tei ïa kane ka projek ban pynthymmai ïa ka Ïingmane. U la pynshlur ïa baroh ba kin wad ïa ki jingkyrkhu jong U Blei halor kito baroh kiba donkti ha kane ka kam bad ban aiti ïa baroh ha ki kti ba kyntang jong U Blei.
Ha kane ka sngi ki riewngeit ki la ïashim bynta da ka jingriewblei bad ka jingrhem mynsiem, ha kaba ki la pynpaw ka jingai jingkyrshan bad jingkyrmen halor kane ka project ban lah ban pyndep ha ka por kaba la buh.
Ha kane ka sngi la donlang u Boben, u contractor uba la ïoh ban pyntrei ïa kane ka kam, ha ryngkatlang bad ki nongtrei jong u. Ka la don ka jingtyrwa da ki jingduwai ba kyrpang halor ki jingïada, ka jingaiti bad ka jingangnud katba ki dang shim ïa kane ka jingkitkhlieh ban tei biang bad ban pynbha ïa kane ka kam.
Kan long ka khyllipmat jong ka jingai nguh ïa U Blei halor ki jinglam lynti ïa kane ka lad ba ki jingbteng jong U ban ïada bad ai ki jingkyrkhu ha baroh ki sngi jong ka jingtei ïa kane ka Ïingmane.
Ka jingdon lang jong kiba bun ki riewngeit ka pyni ïa ka jingsngew longtrai bad ka jingkyrshan jong ki halor kane ka projek kaba kongsan.
Katba ka kam ka dang ïaid ki dkhot jong ka parish ki kwah bad pynpaw ka jingkyrmen ba yn lah ban pyndep ïa kane ka jingtei da ka jingjop ka ban long ruh ka jingmyntoi na ka bynta ki jinglehniam bapher bapher bad ki jingduwai kiba kyntang hadien ba la lah ban pyndep ïa kane ka jingtei ïa kane ka Ïingmane ba thymmai.
Lah ban ong ba kane ka Garobadha ka dei ka shnong kaba dang hab hapoh ka Selsella sub-district jong ka West Garo Hills district ha Meghalaya.