Kular u Rajnath ïa ki nongïalam ka BJP ban leh ei ei halor ka jingpynkynriah ïa ki Harijan na Them ïew Mawlong

By Mawphor Editor On Jun 22, 2026

Shillong, Jylliew 21 : U Myntri kam ïada Ri u Rajnath Singh ula kular ïa ki nongïalam ka BJP Meghalaya halor ka jingsngewkhia ba ki pynsngew ha kaba ïadei bad ka jingpynkynriah ïa ki jaidbynriew Harijan na Them ïew Mawlong bad ki kynrum kynram kam jaka ha Shillong Contonment, yn sa shimkhia ban pynbeit noh kham kloi.
Ka kynhun ka BJP ba ïalam da u President Rikman Momin, ki la leit ïakynduh ïa u Rajnath Singh ha ka jingwan ïuhkjat ha Shillong bad la ïakren ïa ki kam kiba shu sahteng da ki snem.
U Momin u pyntip sha u Myntri ïada Ri ba ka jingpynbeit da ka jingïasngewthuh jingmut halor ka Them ïew Mawlong ka long kaba donkam na ka bynta ka jingïashongsuk shongsaiñ hapoh ka Jylla bad yn sa shimkhia bha ïa ka lyngba ka jingïakren hapdeng ka Sorkar Pdeng bad sorkar Jylla
Ka President ka BJP East Khasi Hills Priambada Blah ka la ong ba ka Jylla ka la trei shaid shaid ban wanrah ïa ka jingïapynbeit, bad ka jingshimkhia mynta kan nang pynkhlaiñ ïa ka jingshaniah hapdeng ki paid Khasi-Jaintia.
Ka la pynpaw ïa ka jingkyrmen ba ïa kane ka kam yn lah ban pynbeit noh ha kane ka samoi treikam jong u Myntri Rangbah Duh u Narendra Modi.
Ka kynhun ka la pynsngew ruh ïa ki jingpynslem ha ka rukom pynïaid kam ha Shillong Contonment. U Vice President ka BJP u Bipen Pradhan ula kyntu ïa ka Ministry ba kan pyntreikam ïa ka building bye-law bad ban shim rai noh ïa ka land policy ba thymmai, kaba la sahkut naduh u snem 2017.
Kat kum ka jingong jong u, ka policy ba shipor hapoh ka STR ka la pynkiew ïa ka dor baiwai jaka kaba kot jan 1000 shah, bad ka jingnang pynslem shuh shuh kan nang buh jingma ban mih ki kam ïakajia.
U President ka BJP Shillong City u Bob Lyngdoh ula kyntu ban ai jingbit noh ïa ka jaka ki shipai ba donkam ban pynheh ïa ka surok na Barik Point sha Jhalupara, haba pynpaw ba ka long kaba kongsan ban pynkylluid ïa kane ka bynta jong ka sor.
Haba sngap ïa kine ki jingpynsngew, u Singh ula ong ba ka Ministry kan sa shong bishar ïa kawei pa kawei ka kam bad un sa ïakhmih lang ruh bad ki bor ba dei khmih ban peit ïa kaei ka lynti kaba lah ban leh.