Wat ki kam ba la lah ban trei hi da ki Khasi ruh ki ïoh: Bah Barikupar

Shillong, Jylliew 21: U MDC ka United Democratic Party (UDP) uba mih khmat ïa ka Shella Constotuency u Bah Barikupar Synrem u la kynnoh ba kane ka Executive Committee (EC) ba la ïalam da ka Voice of the People Party (VPP) ha KHADC kala ai Trading License ba thymmai haduh 99 tylli.
Haba ïa kren bad ki lad pathai khubor u Bah Barikupar Synrem u la ong, Ha ka por ba don ka Vote of Account u la ong ba ki don 73 tylli bad kala mih ha kawei na ki lad pathai khubor ba ioh kidei ki nongkhaïi Dohkha.
“Katkum ka jingtip ba la ioh ki don haduh 99 tylli mynta ki Trading License kiba la ai thymmai da ka Executive Committee bad napdeng kine ki don ba ki briew jong ngi kim pat kotbor bad lehse kiba ioh ka Central Project ki la leh ïa kaba donkam eh ban ioh ïa ka Trading License bad ïa kata ngi da kren than hynrei ngi kren halor ki kam ba ki Khasi jong ngi kiba la lah ban trei” ong u Bah Synrem.
U Bah Synrem u la pynpaw ruh ka jingsngewkhia bad ka jingsngewdiaw halor ka jingduh ban kren ïa ki mat kiba pher bapher namar ba u la dep ban buh ki jingkylli hynrei kim shym la mih satia ha kaba iadei bad ka Trade bad kumjuh ruh ka Cut Motion da ka Kong Rona Khymdeit, hynrei namar ka jinglyngkot jon ka por khlem ioh rah shuh ïa ka cut mation.
Shuh shuh u Bah Synrem u la ong, “Nga shu kwah ban buh jingkylli ïa u CEM ba na ka por sha ka por u ju pynmih ïa ka kyntien ba ngi kum ka liang synshar ngim kwah bad ngin ym ai ruh ka ka trading license khamtam ïa kino kino ki kam ba ki Khasi ki lah lah ban trei bad ha kajuh ka por ruh ha ki shnong ki thaw ba shong basah ki Khasi ngin ym ai trading license hynrei ha ka jingwad jong nga nga lap ba ka long da khongpong”.
U Bah Synrem u la ong ba ka por ba don ka Vote of Account u CEM u la ai ktien ba da lah kut ka dorbar un ai ïa ka list trading license ha u Bah Titos hynrei kaei ba sngewsih ba mynta lah dap lai bnai bad lah kut sa ka dorbar ba thymmai ruh khlem ioh hi ïa kata ka list jong ka trading license.
Kum ki MDC ba kit khlieh kiba pyrkhat na ka bynta ka jingbha jong ka lawei ka pateng, ngim banse ban pan ïa kine ki list Trading License bad ngi lap shai ba ki don ki kam kum ki dukan sha, kiba suh jain kiba die ja bad kumta ter ter ba ki Khasi jong ngi ki la lah ban leh hynrei ki don kiba ioh trading license, u la ong.
“Ym tang ki kam hynrei ki jaka ruh kum ha ïew ba kumno ki briew ki ju wad dukan ha ïew, hynrei ngi ioh jingshai ba ki briew kiba ioh dukan ha ïew ruh kidei ki briew nabar bad ngam lah shuh ban sngewthuh ïa ka jingmut u CEM uba ong ban ym ai Trading License ïa ki briew ba nabar” ong u Bah Synrem.
U Bah Synrem u la ong, “Ka long kaba sngewlyngngoh bad thamula ha kajuh ka por ba ha ka 2 tarik u bnai Nohprah jong u snem 2025 kala mih ka order napoh ka ophis KHADC ba lah mana bad hukum sha ki shnong bapher bapher ban ym ai NoC shuh ïa ki Wine Store bad Bonded Warehouse hynrei kaba sngew thmula ka long ba hangne ha ka list ba nga ioh ki don ar tylli ki Bonded bad kawei na kita ba halor ka jingkhang ka Blingkit kaba don ha jingkieng Nongthymmai mynta la mih da ka Restaurant bad ka Bar”
Kane hato kam wanrah ïa ka jingsniew ha ka imlang ka sahlang bad kine kidei kiei kiei ba nga kwah ba u CEM un jubab, ong u Bah Synrem.