Ïathir ki Sahep halor ka Thup Kyrteng Elekshon kaba biang ba khuid ka bym don jingbakla

Nongstoiñ, Jylliew 21: Ka jingïalang bad ki Electoral Registration Officer (ERO), ki Assistant Electoral Registration Officer (AERO) bad kiwei ki ophisar ba dei peit ïa ki kam Election, halor ka jingpynlong ïa ka Special Intensive Revision (SIR) jong ka Electoral Roll da kaba shim ïa ka 01.10.2026 kum ka Qualifying Date, ka la long ha Conference Hall DC Ophis Nongstoiñ.
Ïa kane ka jingïalang la pynïaid da ka Hema Nayak IAS, District Election Officer West Khasi Hills District.Ha kane ka jingïalang la ïakren bniah halor ka jingïaid lynti, ka por treikam bad ki bynta bapher bapher kiba don jingïadei bad ka jingpynbeit thymmai ïa ka Electoral Roll, khnang ban pynthikna ïa ka jingdon jong ka Electoral Roll kaba biang bad kaba khuid kaba bym don jingbakla.
La bishar bniah ruh ïa ki bynta bapher bapher jong ka prokram SIR, kynthup ïa ka jingpynkhreh bad jingai jinghikai, ka jingjurip na ka ïing sha ka ïing da ki Booth Level Officer (BLO), ka jingpynbeit ryntih ïa ki Polling Station, ka jingpynmih ïa ka Draft Electoral Roll, ka jingpdiang bad jingbishar ïa ki jingdawa, jingujor bad ka jingpynmih ïa ka Final Electoral Roll.
La pyntip ha ki ophisar ba ka 1 tarik Risaw 2026 ka long ka Qualifying Date jong kane ka Revision. Ka jingjurip na ka ïing sha ka ïing da ki BLO kan sdang naduh 30 tarik Jylliew haduh 29 tarik Naitung 2026.
Nangta yn pynmih ïa ka Draft Electoral Roll ha ka 5 tarik Nailar 2026. Ka por ban pdiang ïa ki jingdawa bad jingujor kan long naduh 5 tarik Nailar haduh 4 tarik Nailur 2026, katba ïa ka Final Electoral Roll yn pynmih paidbah ha ka 7 tarik Risaw 2026.
Ka District Election Officer ka la ban jur halor ka jingdonkam jong ka jingïatreilang hapdeng baroh ki nongtrei Election bad ka la kyntu ïa baroh, ban pyndep ïa ki kam ha ka por kaba la buh da ka Election Commission of India.
Ka la kdew ruh ïa ka bynta kaba kongsan jong ki ERO, ki AERO bad ki BLO ha ka ban pynthikna ba baroh ki nongthep vote kiba don hok ban ïoh kyrteng kin don ha ka Electoral Roll bad ba ka jingpynbeit kan long kaba shai, kaba hok bad kaba treikam bha.
Hadien kane, la pynlong ruh ïa ka jingïalang bad ki nongmihkhmat jong ki seng saiñ pyrthei bapher bapher ban pynshai halor ka prokram Special Intensive Revision bad ban kyrpad ïa ka jingïatreilang jong ki ha kane ka kam. Ha kane ka jingïalang la batai ruh ïa ka bynta kaba kongsan jong ki Booth Level Agent (BLA) kiba la thung da ki seng saiñ pyrthei bapher bapher.
La kyntu ïa ki BLA ban ïatreilang bad ki Booth Level Officer (BLO) ha ka jingpynshisha ïa ki jingtip jong ki nongthep vote, ka jingïarap ban ithuh ïa ki nongthep vote kiba don hok ban ïoh kyrteng bad ka jingïarap ha ka jingphah ïa ki jingdawa ne jingujor lada donkam.
La pynsngew ruh ba ka jingïashimbynta jong ki BLA kan ïarap ban pynkhlaiñ ïa ka jingshngaiñ paidbah, ka jingshai bad ka jingbiang jong ka Electoral Roll.
Ïa kane ka jingïalang la wan ïashimbynta da ki ERO, ki AERO, ki nongmihkhmat jong ki seng saiñ pyrthei bad kiwei ki ophisar kiba don bynta ha ki kam Election ha ka distrik.