11 tylli ki Karkhana pynmih marbam ki la don ha ka jylla, ïoh jingmyntoi palat 55 hajar ngut ki Nongrep

Shillong, Jylliew 20 : U Myntri Rangbah ka jylla u Conrad K Sangma ula iathuh ba ka Meghalaya ka la don mynta haduh 11 tylli ki Karkhana pynmih marbam na ki mar rep ka jylla (Processing Unit) kiba la treikam bad lyngba kine ka la ai jingkyrshan ïa kumba 55,000 ngut ki nongrep bad ïa ka ïing ka sem jong ki.
U Myntri Rangbah ka Jylla u Conrad K Sangma myn ha ka sngi Thohdieng, ula ong ba ka karkhana pynmih musla organic (Organic Spice Processing Plant) ha Ri-Bhoi kum ka “sienjam ban wanrah jingkylla” na ka bynta ki nongrep, bad ainam sha ka jingshakri ba phra snem sha ki kam ba da thmu na ka bynta ban kyntiew ïa ka ïoh ka kot ki nongkyndong ha kylleng ka Jylla.
Haba kren ha ka jingïalang ha ryngkat ka jingïadonlang ka Myntri Pla Tyngka ka Ri ka Nirmala Sitharaman, u Conrad ula ai khublei ïa ka Myntri namar ka jingkyrshan ïa ka roi ka par jong ka thaiñ Shatei Lam Mihngi.
Ula ong ba ka jingpynleit jingmut jong ka Sorkar naduh u snem 2018 kala long eh halor ki kam kiba lah ban leh ban kyntiew ïa ki nongrep , ki jingtei kiba kham biang, ka jingpynïoh ïa ki ïew, ki jingai jinghikai, bad ka jingpynmih ïa ki mar ba kham heh dor na ki marrep ha ka jaka jong kawei ka scheme kaba mang lut ïa baroh.
“Ngi la nang tei ïa kaei kaba ki nongrep ki la leh bha – ki rukom rep tynrai – ai jingkyrshan song pisa, ka jinghikai bad pynïasoh sha ki ïew ïa ki kynhun nongrep kiba kut jingmut hok” ula ong.
“Kiba rit, ki sienjam ba da pynleit jingmut ki lah ban wanrah ïa ki jingkylla kiba heh ha ka kamai jakpoh bad ka ïoh ka kot ha ki nongkyndong” ula ong. Ula pynpaw ïa ka jingai jingmut ba dang shen jong ka Myntri Pla Tyngka halor ka jingpynpoi mar, ka jingshalan bad ka jingpynmih ïa ki mar ba kham heh dor, haba pynpaw ba ka Jylla naduh kata, kala pyrshang ban pynbiang ïa ki Cold Storage, na ka bynta ka jingbym pyut ki mar bad ka jingneh slem ki mar ban lah poi sha ki ïew kiba heh.
Ula pynpaw ruh ïa ka jingnang kiew ka jingïatreilang hapdeng ki Jylla jong ka thaiñ Shatei Lam Mihngi. “Ka thaiñ mynta ka don ïa ka synshar khadar kaba skhem, ki jaka treikam kiba khlaiñ. Hapoh ka jingïalam u Myntri Rangbah Duh u Narendra Modi, ka thaiñ ka la ïaid ryngkat ryngkat bad kiwei ki bynta jong ka ri India bad noh synñiang sha ka jingkiew shaphrang ka Ri” ong u Conrad.
U Secretary ka Tnad Agriculture Vijay Kumar D, ula ong ba kane ka jingplie ka dei u mawmer na ka bynta ki 3.6 lak ki longïing nongrep jong ka Jylla. U ong ba kane ka karkhana ha Ri-Bhoi ka lah ban kyntiew ïa ka kamai ki nongrep da jan 50% tang ha kawei ka aiom da kaba khate ïa ka jingduhnong hadien ba dep ka aiom ot bad ka jingpynïasoh sha ki iew.