Na Aizawl la wanrah ïa ki shijur ki jait shrieh Macaque bad la pynkha ha Meghalaya State Zoo

Shillong, Jylliew 20: Ka Meghalaya State Zoo ka la sakhi ïa ka jingwanrah ïa u jait shrieh Macaque bad kan dei ha ka sien nyngkong ba la pynkha ha ka jaka peitkai ïa ki mrad.
Katkum ka kyrwoh khubor la ïathuh ba la wanrah ïa kitei ki shrieh shijur ki kynthei bad shynrang na Aizawl Zoological Park, Mizoram, hapoh ka prokram ïa kylliang ïa ki mrad.
La ïathuh ba ka jingwanrah ïa kine ki jait shrieh ka long ka jingpeit ïa ka jinglah jong ki ban shah ïa ki jaka jong ka mariang ba thymmai bad ka rukom ban sumar ïa ki mrad, ka jingkyrshan jong ki doktor mrad bad ka rukom pynïaid da ka nongrim saïan ha katei ka jaka peitkai ïa ki mrad.
Ïa kine ki shrieh, la ong ba ki long ki mrad kiba duna bad tlot bor ha ka thup jong ka IUCN bad ki mad ïa ki jingma na ka jingiehnoh jong ki jaka sah ki mrad ne ki sim, ka jingïapait bad ka jingshah pynthut ha ki briew. Kane ka jingpynroi kaba jop ïa kine ki mrad ka pynïoh ïa ka jingtrei shitom ba bteng ban ai jingïada ïa ki lyngba ka prokram.
La ong ba kine ki shrieh ba dang shu dep kha ki don ha ka met ba koit ba khiah bad dang peitngor ki doktor mrad jong kane ka jaka peitkai ïa ki mrad katba ki dang shong hajan lang bad ka kmie bad ka kynhun.
U D. Sathiyan, PCCF (Wildlife & Biodiversity) bad Chief Wildlife Warden, Meghalaya, u la batai ba kane ka prokram ka long kum ka jingpynshlur kaba la mih na ka jingtrei shitom ba bteng ha ka ban ai jingïada ïa ki mrad ha kane ka jylla.
U la ong ba ka jingkut jingmut na ka liang kane ka jaka ri mrad bad ai jingïada ïa ki mrad ba shem jingma, ka long ka jingjop ïa ka jylla Meghalaya, ha kajuh ka por ka pynïoh ïa ka jinghusiar bakhraw ïa ki paidbah shaphang ka jingdonkam jong ki jaka pule shaphang ki mrad ha ka ban ai jingïada ïa kiba shem jingma bad jingeh na ka bynta ka lawei ki pateng jong ki ka ban wan.