Lyngba ka NHM, la sdang ïa ki lad jingsumar bad jingïada na ka jingpang pynhiar kpoh ha SWGHD

Shillong, Jylliew, 20: Ha kine ki sngi la sdang ïa ka prokram ban ïada na ka jingpang pynhiar kpoh 2026 ha Balalgre LP School, South West Garo Hills, kaba hap hapoh ka National Health Mission (NHM), Meghalaya.
La sdang ïa katei ka prokram da u D. B. G. Momin, uba dei u Additional Deputy Commissioner, South West Garo Hills, ha ka jingïadonlang jong ki heh ka koit ka khiah kane ka district, ki nongtrei, ki nongïalam ka imlang ka sahlang, ki nonghikai, ki samla pule bad ki nongshong shnong.
Ka jingthmu jong kane ka prokram ka dei halor ka jinghusiar ban ïada na ka jingpynhiar kpoh, khamtam hapdeng ki khynnah, ka jingïashim bynta lang ki nongshong shnong, kham pynbiang ïa ka jingleh khuid bad ïoh ka jingsumar ha ka por ba biang.
Ha kane ka prokram jingïalang, u D. B. G. Momin u la ïaroh ïa ka jingtrei shitom jong ka tnad ka koit ka khiah ha ka ban pynlong kane ka prokram bad ban jur ïa ka jingdonkam jong ka jingshim khia ka bor imlang sahlang ha ka ban pynshlur ïa ki rukom im kiba koit ba khiah bad ai ki lad ban ïada kiba pynmyntoi ban ai jingïada ïa ka koit ka khiah jong ki khynnah bad ki riew paidbah kiba shem jingeh.
Haba kren ha kane ka prokram, ka Dr. Noreen Sangma, kaba dei ka District Maternal bad Child Health Officer (DMCHO), ka la ban jur halor ka jingdonkam ka jingleh khuid bad ban dih ïa ka um ba la dep shet khnang ban lait na ka pynhiar kpoh.
Ka la ong ruh ba donkam ban sait ïa ki kti da ka sabon, ka jingleh khuid leh suba, ka rukom sait khuid ïa ki jhur ka bam ka dih bad ka jingdih ïa u Oral Rehydration Solution (ORS) bad ki dawai Zinc na ka bynta ban teh la kam ïa ka jingpynhiar kpoh.
Ha kaba ïadei bad kane ka prokram, la pynlong ïa ka jingleh ïa ki test ha katei ka shnong ïa ki nongshong shnong bad la don baroh haduh 147 ngut ki nongïoh jingmyntoi, kynthup ïa 100 ngut kiba la heh la san, 28 ngut ki tymmen bad 19 ngut ki khynnah.
Kane ka jingleh test ka la ai bun ki bynta jong ka jingsumar ïa ka koit ka khiah kynthup ïa ki jingshem ïa ka koit ka khiah baroh kawei, test ïa ki khmat bad kiwei kiwei bad ka jingsam ïa ki dawai dashin ba kongsan. La pynïasoh ïa u Aadhaar bad MHIS na ka bynta ki nongïoh jingmyntoi.
Kane ka prokram ka kynthup ruh ïa ki jingïalang pynshai bad ka jingpynpaw kaba shai halor ka rukom sait kti kaba biang ban kyntu ïa ka rukom im kaba koit kaba khiah hapdeng ki khynnah skul bad ki nongshong shnong.
Ka sngi kaba kmen ka la sakhi ïa ka jingdon bynta shitrhem na ki paidbah bad ka la poi sha ka jingkut kaba jop ryngkat ka jingkular lang ban pynbha ïa ka koit ka khiah ka imlang sahlang bad ban pynduna ïa ka jingeh na ki jingshitom hapoh ka distrik.