Kiba ïaleh eksamin NEET ki dei ban poi kloi sha ka centre ha Upper Shillong la 21 tarik

Shillong, Jylliew 19 : Ki bor pynïaid district ka East Khasi Hills ki la kyrpad ïa ki samla ki ban ïaleh ïa ka eksamin NEET (UG) Re-Exam ha Centre PM Shri Kendriya Vidyalaya ha Upper Shillong ba ki dei ban ialeh ban mih kloi na la ïing ha ka 21 tarik u Jylliew.
Ki bor pyniaid district kila pynpaw ba ha katei ka sngi ban don ka eksamin, ka jingïaid ki kali ha katei ka thaiñ ka lah ban suki bha namar ka jingpynkhreh ïa ki lad jingïada ïa ka jingwan jngoh jong ka Myntri Pla Tyngka ka ri ha katei kajuh hi ka sngi.
Ha ka kyrwoh hynne ka sngi Thohdieng, u Deputy Commissioner ka East Khasi Hills, ula ong, ba ka jingleit jngoh ka heh sorkar ïa ka Kendriya Vidyalaya, EAC Headquarters, kan donkam ban pyrkhing ïa ka rukom ïaid jong ki kali ha ka thaiñ ka ban poi sha Upper Shillong. Kane ka lah ban lam sha ka jingdheng kali bad ka jingslem ha katei ka por ba don ïa ka eksamin.
Ki samla pule ba kin lait na kano kano ka jingeh ban poi slem sha ka jaka thoh eksamin, ki bor pynïaid district ki la kyntu ïa baroh ki ban leit ïaleh eksamin sha ka thaiñ Upper Shillong ba ki dei ban mih kloi bad kylluid bha ka por noh na la ïing bad ruh ban rah ïa ki kot ki sla kiba donkam ban ïoh rung sha ka jaka thoh eksamin.
“La shim lut ïa baroh ki lad ban pynthikna ba ka jingpynlong ïa ka eksamin kan long kaba ïaid beit” la ong u DC bad ka pan ïa ka jingïatreilang na ki nongshong shnong bad ki nongleit nongwan.