Shillong, Jylliew 19 : Mynta ka Sngi Thohdieng 19 tarik Jylliew 2026, u Lat ka jylla u C. H. Vijayashankar u la pdiang bad mynjur ïa ka jinghiar shuki u MDC ka Voice of the People Party (VPP) uba na Mawkyrwat Constituency u Bah Pynkhrawboklin Kharjahrin, kum u Executive Member (EM) jong ka Executive Committee ka VPP ha Khasi Hills Autonomous District Council (KHADC) kat kum ka Rule 21(1) (B) jongka Assam and Meghalaya Autonomous District (Constitution of District Council) Rules 1951 kaba la wanrah jingpynkylla ruh da ka KHADC.
Ka khubor iehnoh kam une u MDC kum u EM ka KHADC ka dei kaba la mih la katto katne taiew mynta bad kat kum ki khubor hamsaia la kynnoh ba kane ka jingiehnohkam ka dei namar ka jingdon ka jingïapher jingmut bad ki nongïalam kane ka party.
U MDC ka Mawkyrwat wat la u la hiar shuki hynrei u dang shong ha ka shuki EM i/c Council Asset ha ka Dorbar Lyiur ba long ha ka sngi Thohdieng 19 tarik Jylliew
Ia ka jingpynbna la pynmih da u Commissioner & Secretary ka Tnad District Council Affairs (DCA) ka Jylla u Bah CVD Diengdoh, ha ka sngi Thohdieng uba la pyntip ba u Lat ula pdiang ïa ka shithi iehnohkam une u MDC kum u EM ka Council.
Kane ka dei ka sien kaba ar ba ki MDC ka VPP ki la hiar shuki hi napoh ka Executive Committee (EC) tang hapoh ka shisnem saw bnai ba kane ka party kala synshar ha KHADC.
Tang hynniew bnai ba ka VPP ka la shimti ïa ka bor synshar ka KHADC, nyngkong eh u MDC ka Langkyrdem-Laitkroh Bah Shembor Rynjah ula hiar shuki kum u Chief Executive Member (CEM) bad mynta sa u MDC ka Mawkyrwat uba la hiar shuki na ka kam EM.
Kiba bun balang ki sngewlyngngoh halor kane ka jinghiar shuki bad ki suba ba ka don kaei re kaei na shalyndet ba poi shaduh u pud ban hiar shuki.
